Platforma Yekitiya Jinên Kurd bi dirûşma; “Bi yekitiya jinên Kurd, ber bi yekitiya neteweyî ye” 3’yemîn Konferansa Platforma Jinên Kurd lidar dixe û dê 2 rojan dewam bike. Konferans li avahiya Odeya Bazirganiyê ya Amedê (DTSO) tê lidarxistin, ji Kurdistan û Tirkiyeyê gelek jin bi kincên xwe yên herêmî beşdarî konferansê bûn.
Li salona konferans tê lidarxistin flamayên ku bi zaravayên Kurmancî, Kirmanckî û Soranî ‘Jin jiyan azadî’ hatiye nivîsand, hat daliqandin.
Devrîm Demîr li ser navê Platforma Yekîtiya Jinên Kurd axivî û got ku Kurdistan bi Peymana Lozanê bûye çar parçe û li van parçeyan li dijî Kurdên van parçeyan polîtîkayên asîmîlasyonê hatine meşandin. Devrîm Demîr, bal kişand ser têkoşîna gelê Kurd a li dijî van êrîş û zextan û diyar kir ku wan ev platform ji bo berfirehkirina têkoşînê û xurtkirina rêxistinê ava kirine.
Devrîm Demîr, her wiha bal kişand ser “Banga Aştî û Civaka Demokratîk” a ku Rêber Apo di 27’ê Sibatê de kiriye û diyar kir ku divê jinên Kurd di vê pêvajoyê de roleke çalak bilîzin.
Devrîm Demîr, got felsefeya “Jin, jiyan, azadî” ji aliyê jinên li çaraliyê cîhanê ve hatiye pejirandin û behsa girîngiya avakirina nasnameya jina Kurd a azad kir.
Di çalakiyê de sînevîzonek ku li ser têkoşîna jinan hatî amadekirin hate nîşandan.
