Kongra Star bi wesîleya 8’ê Adarê Roja Jinên Kedkar ên Cîhanê daxuyaniyeke nivîskî weşand. Kongra Star, tevahiya jinên ku têkoşîna azadiyê didin ji girtîgehan heta çiyayên azad, ji xebatên civakî heta xebatên zanistî û xweparastinê silav kir û got, “Em berxwedana rûmetê ya Bendava Tişrîn ku ji nû ve dîrok nivîsand bi coşa 8’ê Adarê silav dikin.”
Daxuyaniya Kongra Star bi vî rengî ye:
“Têkoşîna me ya jina azad ji dîroka kevnar ve heya roja îro bê navber didome. Ji Rosa Luxsemburg heya Sakîne Cansiz, ji Viyan soran heya Jîna Emînî, Şêrîn Elemhurî û Hêva Erebo têkoşîn berdewam dike. Li Rojava Bakur û Rojhilatê Sûriyeyê dema ku em pêşengiya şoreşa jinan û xweparastina şoreşa xwe dikin, hevalên pêşengtiya şoreşa azadî û wekheviyê dikin mîna Kerem Şihab, Menîce Heyder Cîhan Bîlgîn, Zozan Hemo, Hezna Ebdî, Mizgîn Qamşilo, Qemer, Hêza Kobanê, Ronahî Yekta, Jînda Kobanê, Dîlan Şoreş û fermandar Arjîn Kobanê di êrîşên qirkirinê yên dewleta Tirk a dagirker û çeteyên girêdayî wan de hatin hedefgirtin. Di şexsê hevrêyên me yên dozê de em hemû şehîdan bi bîr tînin û soza xwe dubare dikin ku em ê hesret û armanca wan a azadiye bi cîh bînin.
Em bi hezkirin û hesret Rêber APO silav dikin. Em bi coş û kelecan 8’ê Aderê careke din ji qadên şoreşa jin li Rêber Apo pîroz dikin. Em bi hemû hêz û hebûna xwe tevlî banga dîrokî ya Rêber Apo ya Aştî û Civaka Demokratîk dibin. Em weke rêxstina Kongra Star, destnîşan dikin ku ji bo çareseriyê divê Rêber Apo di aliyê fîzîkî de azad bibe. Rêber Apo bi banga xwe li Kurdistanê û Rojhilata navîn heta dawî derî vekir. Ev banga dîrokî bû zemîna herî xurt a çareseriya sedsalê û her wiha pirsgirêka azadiya jinan misoger dike, xwedî derketina jinan a li pêvajoyê mijarê hebûnê ye.
Ev meşa dirêj a têkoşînê îro şax berdaya her aliyê cihanê, Rêber Apo bi diyarkirina pîvanên azadiyê re rê li cîhaneke ji dervî cîhan û hişmendiya olperst, netewperest, zayendîperest ji bo jinan û gelan her wiha ji bo mirovahiyê afirandiye. Dibin şert û mercên giran Rêber Apo li girtîgeha Îmraliyê paradîgmaya demokratîk, Ekolojîk û Azadiya jinê pêş xist. Ev paradîgma êdî ne teorî ne jî tenê gotin, bi jiyanî, civakî, siyasî, bi modêla îradeya azad hemû rengên civakê xwe bi xwe rêxistin dike, jiyana azad û wekhev di nava jinan û gelan de bi alternatîf pêk hat.
DIXWAZIN HEBÛNA JINAN TUNE BIKIN
Di vê pêvajoyê de li seranserî qadên têkoşîna jina azad em dibînin ku şer, dagirkerî, koçberî, şîdet, hejarî, qirkirina xwezayê li her derê derdikeve pêşberî me. Li Kurdistanê ev rastî bi sûîkastî, polîtîkayên qirkirina siyasî, qirkirina jinan, tacîz û destdirêjî û her wiha darvekirina jinan û zewaca temen biçûk li ser jinan xwe dide der. Ev pergala modernîteya kapîtalîst û zihniyeta serdest a mêr,bi hişmendiya planên dewleta Tirk a dagirker tê pêkanîn. Li her derê cîhanê jin li hemberî neheqiyê, li hember serdestiya mêr û pergala desthilatdar serî radikin û têkoşîn dikin.
Her ku asta têkoşîna jinan bilind dibe, asta zanabûna bi zanista jin xurt dibe. Çand û felsefeya ‘JIN, JIYAN, AZADÎ’ li her derê tê runiştandin, şiyarbûn û zanabûna jinan her ku pêş dikeve civak jî pêre şiyar û zana dibe, ev bi pêşengitiya şoreşa jin bandora xwe li tevahî civakê kir. Ev jî dide nîşandan ku bandora têkoşîna jinê çiqasî gerdûnî bibe ewqasî JIN, JIYAN AZADÎ bi serdikeve. Li hemberî vê pergala xetimandî êdî pêwîstî bi têkoşîneke zanistî, rêxistinkirî, hevgirtî û parastina jinan û mirovahiyê heye.
Ji nû ve avakirina Sûriyeyê di rojevê de ye. Nexşeya Rojhilata Navîn ji nû ve tên xêzkirin, di vê pêvajoyê de komara Sûriyeyê bi rengekî îradeya jinê nebîne hate avakirin. Niha jî bi HTŞ’ê re tabloyek hîn xetertir derdikeve holê. Em dibînin ji aliyekî sûcên giran weke girtin, tundî, kuştin, bi paçê reş li jinan ferzkirin rêbazên ku nefesê li jinan teng dikin didin meşandin. Her wiha li aliyê din li ser jinan û malbatên di heremên di bin dagirkeriya Dewleta Tirk de mîna Serê Kaniyê, Efrîn û Grê Sipî, Bab, Cereblûs kiryarên şer pêk tînin.
JI BO ŞOREŞÊ Û BIHARA AZADIYÊ Jin bi vîn xwe, bi serhildana xwe, bi pîvanên redkirinê, bi zanabûna jiyana azad û bi konfedralîzma demokratîk re modêla çareseriyê pêşkêş dike û bi avakirina wê re jiyanê mîna biharê zindî û ronî dike.
Bi wesîleya 8’ê Adarê em bang li hemû jinên wêrek ên li qadên azadiyê, her wiha bang li jinên dildarên azadiyê li tevahî bajarên Sûriyeyê dikin ku ji bo pêkhatina Sûriyeke demokratîk, nenavendî û avakirina siberojek ku jin jî biryar tê de bide, têkoşîna hevpar pêk bînin. Em bang li hemû jinan dikin ku bi coşa 8’ê Adarê bi hêza xwe em tevlî banga Rêber Apo ya Aştî û Civaka Demokratîk a xwe dispêre azadiya jinan bibin. Werin em bi yekîtî û hevgirtina xwe 8’ê Adarê li qadên jina azad pîroz bikin.
Em weke Kongra Star li ser bingeha baweriya me bi mafên jinan û pêwîstiya beşdarbûna wê di avakirina siberoja Sûriyê de, bi boneya 8’ê Adarê em balê dikişînin ser van xalan:
Li ser banga dîrokî ya Rêber Apo ya Aştî û civaka demokratîk em ê di Rojava û Sûriyeyê de têkoşîna xwe xurt bikin û ji bo banga dîrokî pêşengtî bikin.
Bilindkirina têkoşînê ji bo azadiya hemû jinên Sûriyeyê.
Di nûde avakirina Sûriyeyê de, Sûriyek demokratîk pirrengî nenavendî û cihêrengiya çandî, zimanî û olî berz bike, bi awayekî ku hevsengiyê di navbera herêmên cuda û civakên xwecihî de pêk bîne, bi destên jinan bê avakirin.
Di destûrê de misogerkirina mafê jinan, em daxwaza nivîsandina destûreke nû ji bo Sûriyê dikin ku mafên jinan bi awayekî zelal û eşkere garantî bike û wekheviya maf û erkên wan bê cudahî misoger bike.
Ji bo avakirna civakek demokratîk, wekhev li ser esasê pergala konfederal a jinan xwe birêxstin bikin.
Em bang dikin ku sîstemeke ku di hemû saziyên qanûndanîn, rêveberî û dadwerî de ji sedî 50 beşdarbûna jinan misoger bike bê qebûlkirin.
Tevlîbûna jinan di pêvajoya siyasî de, pêvajoyên siyasî yên ku tevlîbûna jin a aktîf di nava xwe de nehewîna bi rengekî bandor wê pêvajoyek îflaskirî be beriya ku destpê bike, lewma em tekez dikin li ser girîngiya temsîl kirineke jin di tevahî qonaxên siyasî de, ji danûstandin heta pêkanînê û misogerkirina hebûna deng daxwazên jinan beşeke bingehîn a çareseriya siyasî bin
Di parastina destkeftiyan de xurtkirina rola jinan, mafê wan e ku destkeftiyên bi dest ketine biparêzin em banga piştgiriyê ji bo Yekîneyên Parastina Jin(YPJ) ên parastina nirxên azadî û demokrasiyê dikin.
Divê gelên Sûriyeyê biryara siberoja Sûriyê bidin, îradeya ku jin çawa dixwazin jiyan bikin girêdayî jinan be.
Pergala xweseriya demokratîk a di çarçoveya konfedralîzma demokratîk de sîstema Hevserokatî yek ji mekanîzama esasî ya avakirina wekhevî û çareseriyê, lewma ji bo sîstemeke demokratîk modêla herî guncave ji bo jin û civak bibin xwedî vîn û biryar di tevahî Sûriye de sîstema Hevserokatiye.”
