Endamê Rêxistina Avakirina Aştiya Civakê ya Emerîkayê ya li Kurdistanê-Iraqê (CPT) Kameran Osman, li ser medya dijîtal têkildarî rêgiriyên artêşa Tirk a dagirker yên li gundên sînorê îdareya serbixwe ya Zaxoyê, agahiyan belav kir.
Kameran Osman diyar kir ku roja 10’ê Hezîranê berpirsên herêmî yên navçeya Derkar û bajarokê Batîfayê ji xelkê gundên herêmên ‘Sîndî û Gulî’ re ragihandibû ku ew dikarin di 15’yê Hezîranê de serdana gundên xwe bikin ku ev 6 salin ji ber artêşa Tirkiyê hatine valakirin.
Di dewamê de Kameran Osman da zanîn ku dema ku gundiyên Sinat, Êre, Heftanîn, Dêreşîşê, Mêrgeşîşê, Ava Gîzê, Bacwa û gundên Geliyê Pisaxa yên Birexrê, Marsîs, Kelok û 11 gundên din ber bi herêmê ve ketine rê, li gundê Şeranîşa Jor li xala kontrolê ya artêşa Tirkiyê rêgirî lê hatine kirin. Leşkeran rê li wan girtiye û gotiye ku herêm di bin kontrola wan de ye û mafê tu kesî nîne vegere.
Hêjayî gotinê ye ku ji sala 2020’an ve artêşa Tirkiyê bi kûrahiya 9 kîlometreyan devera Heftanînê û gundên derdorê xistiye bin kontrola xwe. Tevî ku bi destpêkirina proseya aştiyê re gundiyên hezar û 192 gundên Herêma Kurdistanê hêvî dikirin ku vegerin ser xaka xwe, lê heta niha ev rê li ber wan girtiye û wekî koçber jiyan dikin.
