Di çarçoveya rêzeçalakiyên 25’ê Mijdarê Roja Têkoşîna li Dijî Tundiya li Ser Jinan a Navnetewî, Meclisa Jinan ya Binarê Qendîlê semînerek lidar xist.
Di semînerê de rola pêşeng a jinên Qendîlê, bandora raman û felsefeya azadiyê li ser civakê hate nirxandin, ku ev yek li gorî herêmên din bûye sedema kêmbûna rêjeya tundiya li ser jinan.
Semîner bi deqeyek rêzgirtinê ji bo giyanê pîroz yê şehîdên têkoşîna azadiyê destpê kir.
Di semînerê de, Rêvebera Meclisa Jinên Binarê Qendîlê Serwîn Celal axivî û bal kişand ser dîroka bixwîn ya berxwedana 25’ê Mijdarê.
Serwîn Celal behsa têkoşîna xwişkên Mirabel (Patria, Minerva û Maria Teresa) kir, ku di sala 1960’an de li Komara Domînîkê ji aliyê rejîma dîktator a Rafael Trujillo ve hatin qetilkirin û li çaraliyê cîhanê bûn sembolên têkoşîn û berxwedana jinan û got; “Îro ev ala têkoşîna jinan ji aliyê jinên Kurd ve bi dirûşmeya ‘Jin, Jiyan, Azadî’ li her çar aliyên Kurdistanê li babikeve.”
Her wisa di dewama axaftina xwe de Serwîn li ser rewşa taybet a jinan li Binarê Qendîlê wiha axivî; “Binarê Qendîlê, ku ji pênc herêm û 67 gundan pêk tê, bûye mînakek cuda ya rêvebirin û xweseriyê.”
Di semînerê de li ser rol û erkê mezin û pîroz yê endamên Tevgera Azadiyê û Gerîlayên Azadiyê hat rawestan ka çawa bi rêya belavkirina hişmendiyê, perwerdehiya civakî û çandina tovên wekheviyê karîne hişmendiya mêrsalar li vê herêmê berevajî bikin.
Her wiha hate tekezkirin ku ji ber hebûna ramana azad, êşa bêwestan ya hevalan û pergala xweseriya demokratîk, jinên li Binarê Qendîlê ne tenê qurbanî ne, lê di hemû aliyên jiyanê de bûne rêber û biryarder.
Li gorî dane û lêkolînên Meclisa Jinan ya Binarê Qendîlê, herêma wan xwedî rêjeya herî kêm ya tundiya li dijî jinan ku ev yek wekî destkeftiyek mezin ya şoreşa jinan û berhema xwîna şehîdan hate pênasekirin.
Di dawiya semînerê de, plan û gavên pêşerojê yên Meclisa Jinan ya Binarê Qendîlê ji bo hişyarkirina civakê û pêşxistina şiyanên jinên li Binarê Qendîlê hatin pêşkêş kirin. Wan soz da ku jinên Binarê Qendîlê dê bi ruhê berxwedanê têkoşîna azadiya jinan bidomînin û dê rê nedin ku tu cûr hişmendiyên kevneperest wan ji azadiyên wan bêpar bike.
