Li Êlihê starta Newroza ku wê bi şîara “Rêbertiya Azad Civaka Demokratîk” û “Ji bo Azadiyê Newroza Civakî ya Demokratîk” bê lidarxistin, bi tevlîbûna hezaran kesî di 12’ê Adarê de li Taxa Korik hate dayîn.
Duyemîn agirê Newrozê jî li kêleka parka Şerzan Kurt a li Taxa Petrolkentê hate vêxistin.
Di pîrozbahiyê de tim û tim dirûşmeyên “Bijî Serok Apo”, “Bê Serok jiyan nabe”, “Jin jiyan azadî”, “Ciwan fedaiyên Rêber Apo ne, “Em ê bi berxwedanê bi ser bikevin” û “PKK gel e, gel li vir e” hatin berzkirin.
Agirê Newrozê bi rêzgirtin û sirûda “Çerxa Şoreşê” hate vêxistin û girseyê li dora agirê bi çepik, dirûşme û tililitan govendê gerandin.
Hevberdevkê Komîteya Amadekar a Newroza Êlihê Mustafa Mesut Tekîk di pîrozbahiyê de axivî. Tekîk diyar kir ku xelkê bajer eleqeyekî mezin nîşanî pîrozbahiyan didin û wiha got: “Destpêkê dayîka aştiyê Sakîne Arat ku jiyana xwe fedayî têkoşîna azadiyê kir û duh jiyana xwe ji dest da, bi bîr tînin. Weke hûn dizanin em vê Newrozê bi şîara ber bi Rêbertiya azad, civaka demokratîk û civaka aşitiyê pîroz dikin. Divê ciwan, zemîna partiyê û hemû welatparêz piştgirî bidin têkoşîna aşitî û azadiyê û pêşengtiyê bikin.”
