Li gorî îstîxbarata Koreya Başûr, rêveberiya Pyongyangê karê dewlemendkirina ûranyûmê ya ji bo hilberîna serikên nukleerî gelekî krîtîk e, li gelek tesîsan dike. Kompleksa Yongbyon yek ji wan tesîsan e ku beriya niha hatibû ragihandin ku hatiye rawestandin, lê belê sala 2021’ê careke ji nû ve hate xebitandin.
Grossi li Seulê civîneke çapemeniyê lidar xist û anî ziman ku wan tespît kirine ku karên li derdora Tesîsa Nukleerê ya Yongbyonê gelekî zêde bûye.
Grossi got, “Di nirxandinên me yên periyodîk de me piştrast kir ku karên li Yongbyonê gelekî zêde bûne.”
Grossi anî ziman ku ev yek nîşan dide ku Koreya Bakur kapasîteya xwe ya hilberandina çekên nukleerî gelekî berfireh kiriye û texmîn dikin ku welat di halê hazir de xwedî hin serikên şer ên nukleerê ye.
Koreya Bakur ku ceribandina xwe ya destpêkê ya nukleerê sala 2006’an kir, ji ber bernameya xwe ya çekan di bin pêkanînên Neteweyên Yekbûyî de ye. Ji sala 2009’an û vir ve jî destûrê nade IAEA’yê ku kontrolê li welêt bike.
Grossi her wiha diyar kir ku li Yongbyonê avahiyeke nû ya dişibe tesîsa dewlemendkirina ûranyûmê hatiye avakirin.
