Ji ber êrîşên qirkirinê yên li ser Herêma Bakur û Rojhilatê Sûriyeyê, rêveberiya xweser a demokratîk bangewaziya seferberiyê ya giştî kir.
Li ser bangewaziya rêveberiya xweser, li Kantona Cizîrê bajarê Hesekê welatî, şev û roj li hemû kolan û taxên bajêr digerin û parastina xwe pêk tînin.
Li taxên cuda yên Hesekê gel, bi şervanên QSD û YPJ’ê re mil bi mil tevdigerin.
Edla Xelîl a ku li taxa Kelase dijî, wiha got: “Li vir ez gelê xwe diparêzim. Ez ê çavê dijmin derxim. Bi dilopa xwîna dawî ya vê laşê xwe jî em ê taxên xwe terk nekin. Serkeftin ya me ye. Ez silavê li Rêber Apo û hevalên di qadên şer de, şervanên YPG û YPJ’ê dikim” û biryardariya xwe nîşan da.
Hemwelatiya bi navê Musa yê ku li heman taxê nobetê digire jî wiha got: “Em parastina xwe pêk tînin. Em ê van axên xwe terk nekin. Em ê her tiştê ku ji destê me tê bikin” û bal kişand ser îradeya gel.
Ciwanê bi navê Elî yê ku li Qûdî çargoşeyê nobeta kolanan digire, wiha got: “Em peywira welatparêziyê pêk tînin. Em ê heta dawiyê berxwedanê bikin, em ê destûrê nedin ku dijmin ziyanê bide gelê me. Em 24 saetan li ser piyan in û di berxwedanê de ne.” Her wiha welatiyê bi navê Cûdî yê li heman deverê jî wiha got: “Li vir em bi van ciwanên ku bi min re ne, ji bo ku li hember komên çete yên ku armanca wan tunekirina gelê me ye bisekinin, em li vir in. Em ê li hember kiryarên qirêj ên komên çete bisekinin. Em ê axa xwe, hebûna xwe, rûmeta gelê Kurd biparêzin. Bangewaziya me ji ciwan û gelê me yê li çar perçeyên Kurdistanê û li Ewropa û cîhanê ev e ku îro li hember êrîşên ku hebûna Kurdan dikin hedef bisekinin. Ji bo me pir girîng e ku gelê Rojavayê Kurdistanê li dora xwe bigire û piştgiriyê bike.”
Şervana azadiyê ya bi navê Kadar jî wiha got: “Em welatê xwe diparêzin. Ez hêvî dikim ku em ê bi gelê xwe re van axan biparêzin. Di sala 2012’an de me li vir şoreş dest pê kir, em ê di dawiya vê şoreşê de careke din berxwedanê bidin destpêkirin. Me van çeteyên hov berê jî tunekiribûn, vê carê jî em ê wan tune bikin. Li Hesekê hemû hêzên me amade ne. Em li axa xwe ne û em ê wê terk nekin. Bila gelê me ji me baweriya xwe temam bike.”
Li Hesekê bi giştî ruhê seferberiyê li hemû bajêr serwer e. Li kolanan parastina kolektîf tê birêxistinkirin
