17’emîn Mihrîcana Çand û Werzîşê ya 4’ê Nîsanê ku ji aliyê qada perwerdeyê ve bi wesîleya rojbûna Rêber Apo hatiye destpêkirin, bi coşek mezin berdewam dike.
Duh serê sibehê ji aliyê komîteyên wargehê ve 200 şitlên daran hatin çandin. Piştî wê danê nîvro jî şahiya 4’ê Nîsanê bi çoşek mezin û girseyî hate destpêkirin. Şahî li Navenda Çand û Huner a Mexmûrê bi hatina xwendevan, jin, zarok û mêvanan re ji bo bîranîna tevahî cangoriyên azadiyê bi deqeyek rêzgirtinê destpê kir.
Qada şahiyê bi wêneyên Rêber Apo, alên PKK, KCK û KJK’ê hatibû xemilandin. Xwendevanên wargehê bi cil û bergên Kurdî û bi meşekî bi heybet ketin qada pîrozbahiyê.
Di serî de li ser wate û girîngiya rojê Hevberdevka Komîteya Perwerdeyê Hêlîn Kara axaftina vekirinê kir û ev roj di serî de li Rêber Apo, şervanên azadiyê û tevahî gelê amade pîroz kir û got: “Di destpêkê de em vê roja pîroz li Rêber Apo û tevahî gelê Kurd pîroz dikin. Em her sal bi boneya 4’ê Nîsanê mihrîcanekî lidar dixin. Mîhrîcana îsal em diyarî Rêbertiya xwe dikin. Ev mîhrîcan qasî 2 mehan berdewam kir û niha jî berdewame. Ev roj, roja ji dayîkbûna me ye. Ev roj xwedî girîngiyek mezine. Em vê rojê ji bo xwe weke roja ji dayîkbûnê dihesibînin. Her ku diçe fikir û felsefeya Rêber Apo mezin dibe. Fikrên Rêbertî mezin dibe û belav dibe. Em carek din vê rojê li tevahî gelê Kurd û dostên Kurdan pîroz dikin.”
Piştre pêşbirka dengbêjî hate lidarxistin û ji her dibistanê komek hatin ser dikê û bi stranên xwe yên xweş coş dan şahiyê.
Koma orkestra ya dibistana navîn hate ser dikê û piştre navbera êvarê hate dayîn.
Şahî di saet 20:00’an de carek din bi pêşbirka zanistê dewam kir û xwendevanan bi zanista xwe bersiva pirsên komîteya amadekar dan.
Piştî wê Koma Navenda Hêvî hate ser dikê û govend gerand. Piştre şahî bi guhdarkirina dengê Rêber Apo berdewam kir û ev kêlî jî li ser piyan hate guhdarkirin.
Herî dawî jî Hunermend Şerîf Omer hate ser dikê û bi stranên xwe coşa şahiyê bilind kir.
Şahî bi dirûşmeya ‘Bijî Serok Apo’ bi dawî bû.
Tê payîn ku îro jî şahî ji cihê mayî berdewam bike.
