Di encamê komkujîyên ku çeteyên SMO, HTŞ û DAÎŞ’ê di roja 13’ê Tîrmeha de li gund û navenda bajarê Suweyda pêkanîn zêdetirî hezar kesî sîvîl jiyana xwe ji dest da. Ev komkujî û êrîş tenê ne ya wê rojê, bû berdewama êşên ku bi salan didome.
Malbat û şahîdên ku di komkujî û êrîşan de xizmên xwe wenda kirin ji ANF’ê re axivîn.
Hemwelatîyê taxa El Celaa ya Bajarê Suweyda Malik Hadî Hemdan dîyarkir ku taxên wan ji ber êrîşê çeteyan di nav bêderfetiyan de ye û got, “hêzên Colanî bi hinceta parastina bajar û pêkanîna ewlehîyê berê xwe dan bajar, lê di rastîyê de armanca wan dizî, talankirin û kuştin bû. Hêzên girêdayî hikûmetê jî bi her cure çekên giran êrîşî me û taxa me kirin. Ligel derfetên kêm ên destê me jî, li hemberî van çeteyan me berxwe da. Ev çete li taxên cuda jî komkujiyên bi heman şeklî pêk anîn. Ev tiştên ku hatin kirin hovitiye, tu eleqeya wan bi mirovahiyê nîne. Li hemberî me êrîşek mezin dan destpêkirin, lê bi saya israr ciwan û gelê me em li hemberî êrîşê çetêyên Colanî sekînin û çeteyan ji Suweyda derxist.”
‘DESTÛR NEDAN KU EM CENAZE JÎ BIGIRIN’
Ji Suweydayê Rena Kîwan jî anî ziman ku li pêş çavên wê hevjînê wê Mihemed Seqir El Berbor û birayê wê j aliyê çeteyên girêdayî rejîma Sûriyê hatine qetilkirin.
Rena Kîwan ji ANF’ê re axivî û şeva êrîşî wisa vegot: “di saetên êvarê de ez û zarokê min li malê bûn. Li derdora saet 02:30’an hatin mala me û kontrol kirin. Lê dema tiştek nedîtîn paş de zivîrin. Cara duyem nêzî saet 05:00’an hatin, mala birayê hevjînê min geriyan, piştre ketin mala me. Pirsa çek heye an na kirin, lê li malê çek tune bû.
Telefonên me girtin û hevjînê min û birayê wî birin li ber malê lêdan. Piştre dîsa hatin. Hevjînê min, birayê wî, kurê wî û kurê min birin jêrzemînê û derî li ser wan kîlîtkirin. Bi saetan wisa man. Wan ji jêrzêmînê derxistin û hevjînê min û birayê wî ji lêpirsînê derbas kirin. Qaşo wê biaxiviyan, lê derxistin derva û derî li ser me de girtin. Piştre li pêş çavên min wan dan ber guleyan. Piştî wê dubare hatin û xwestin kurê min ê ku diçû pola 9 bibin. Vê carê me berxwe da. Me xwest cenazeye hevjînê xwe bigirin, lê destûr nedan. Em tehdit kirin û gotin, hûnê dernekevin derva.”
