Desteserkirina Şaredariya Qaxizmanê ya ji aliyê desthilatdariya AKP’ê ve û tayînkirina qeyûm, li bajêr bi meşeke girseyî hat şermezarkirin. Meşa ku li ber avahiya Rêxistina DEM Partiyê ya Qaxizmanê destpê kir, heta qada navçeyê dewam kir. Piştî meşê daxuyanî hat dayîn. Hevşaredarên Qaxizmanê Mehmet Alkan û Guner Hatay, Parlamenterên DEM Partiyê Nejla Demîr, Heval Bozdag, Yilmaz Hun û gelek endamên partiyê beşdarî daxuyaniyê bûn.
Parlamentera DEM Partiyê yê Agiriyê Nejla Demîr, diyar kir ku desthilatdarî ji îradeya gel ditirse û ji ber vê bi tayînkirina qeyûman şaredarî desteser dike. Nejla Demîr, destnîşan kir ku desthilatdarî plana sê qonaxan xistiye dewrê û got, “Ya yekemîn bi hincetên cuda doz li hevşaredaran tê vekirin. Ya duyemîn bi polîs û leşkeran hewl tê dayîn ku gel bê tirsandin û ya sêyemîn jî qeyûm tayînê şaredariyan dike. Dibe ku hûn hêza dewletê bikar bînin û şaredarî desteser bikin, lê ya esasî berxwedana gel e. Em bi berxwedana xwe di dîrokê de cih digirin û hûn jî dê di sergoya qirêjî ya dîrokê de cih bigirin. Heke desthilatdarî ji bo tayînkirina qeyûm bi israr be, em jî ji bo têkoşîna xwe bibiryar in.”
Hevşaredarê Qaxizmanê Mehmet Alkan jî got: “Tayînkirina qeyûm nayê qebûlkirin. Weke kesên rewa me xizmet ji gelê Qaxizmanê re kir. Ev jî ji bo veşartina bêhêziya xwe, bi hêzên ewlekariyê re bûn yek û şaredariya me desteser kirin. Em xwediyên vê navçeyê ne. Ne em qeyûm nas dikin, ne jî ew me nas dike. Nehiştin em xizmeta xwe ya ji bo gelê xwe bidomînin. Tu qedrê van kesan di çavê gel de nîne. Bi dozeke vala dosye vekirin û ji bo tayînkirina qeyûm ceza dan. Em vî cezayî qebûl nakin û qeyûm nas nakin. Şaredarî yên gel in. Em ê bi gelê xwe re bin û têbikoşin. Qeyûm nikarin me têk bibin.”
Hevşaredara Qaxizmanê Guner Hatay, jî ev tişt anî ziman: “Dema mesele dibe Kurd, hiqûqeke cuda dikeve meriyetê. Doza li hevşaredarê me hatiye vekirin ne dozeke hiqûqî ye. Mixabin bi tayînkirina qeyûman îrade gelê Kurd binpê dikin û dixwazin tune bikin. Lê em jî dibêjin ku em ê vê desteserkirinê qebûl nekin. Dê têkoşîna me bidome. Gelê Kurd dê dev ji têkoşîna azadiyê bernede.”
Parlamenterê DEM Partiyê yê Îdirê Yilmaz Hun jî wiha got: “Di hilbijartinê de xelkê Qaxizmanê çû ser sindoqan û tevî bêhiqûqiyan jî îradeya xwe nîşan da. Hevşaredarên me bi dengê gel hatin hilbijartin û em memûrekî hatiye tayînkirin qebûl nakin. Gel jî qebûl nake. Mafê bijartin û hilbijartinê yê gelê Kurd nayê naskirin. Ev nayê qebûlkirin. Dê têkoşîna me ya li dijî vê bidome. Em baş dizanin ka qeyûm çi dike. Erdê gel didin ber firotinê û pêşkeşî alîgirên xwe dikin. Ev rejîmeke faşîst e. Çi dikin bila bikin gelê Kurd ê xwe birêxistin bike û serî netewîne.”
