Bi taybetî di meha Îlon û Cotmehê de her roja Pêncşem û Înê cejnên qubeyan tên pîrozkirin. Ji duh ve li Serdeşa Şengalê Cejna Şêxil Qasim tê pîrozkirin. Duh êvarî ji bo giyanê şehîdan li Goristana Şehîd Berxwedan û Şehîd Dilgeş a li ser Çiyayê Şengalê xêr hatin belavkirin. Serê vê sibê li her derê Şengalê Êzidiyan berê xwe dan goristanê. Piştî xêr û duayên xwe kirin, berê xwe dan Quba Şêx Qasim. Piştî rê û resmên olî, duayan û girêdana periyê Êziyan govend gerandin.
Êzidiyên beşdarî cejnê bûn, keyfxweşî û girêdana xwe bi bîr û baweriya Êzidiyatiyê re anîn ziman.
Nesîme Hemo Berekat cejin li tevahî Êzidiyan pîroz kir û bang li tevahî Êzidiyan kir ku vegerin ser cih û warên xwe û xwedî li baweriya xwe derkevin; Her sal roj û şahiyên me xweştir dibin. Bi vegera li ser cih û warê xwe jî emê zêdetir keyfxweş bibin.
Li ser cil û bergên Êzidiyan ku taybet jina Êzidî li xwe kirî jî wekî kofiya heftrengî ku gelek pênaseyên têde dîrokî bi nav dike û dibêje; Ev çandeke qedîme. Berê zêdetir bûkan li xwe dikir. Divê em xwedî li çanda xwe derkevin. Em hemû cejnên xwe pîroz dikin. Divê yên li kampan jî vegirin.
Kinê Silêman ku cil û bergên Êzidiyan li xwe kirîbû pîrozkirina cejnên berê bibîr xist û anî ziman ku cejnên berê ji yên niha hîn xweştir bûn û hêviya berdana tevahî dîlgirtiyan kir û got: Berê kesên hejir, mewîj, şîr, gûşt, rûn û çi tiştên malde hebû dianîn. Wekî niha ferehî nebû, lê xweşiya wê demê xweştir bû. Berê belengazî zêdertir bû. Lê zêdetir xwedî li çanda xwe derdiketin, cil û bergên Êzidiyan li xwe dikirin. Van du salên dawiyê zêdetir serdana qubeyan tê kirin.
Gebro Heyder jî cejin li tevahî Êzidiyan pîroz kir û diyar kir ku Êzidiyatî xwedî nirxek pîroze û cih da van pênaseyên giring: Yek xirete, yek îbadete û zina neke. Êzidiyên helal bin difirin. Leyla û Mecnûn Êzidî bûn çûne esimanan.
Heyder rexne li Êzidiyên bîr û baweriyên xwe bi cih naynin jî kir û li ser cil û bergên Êzidiyan ku di cejin û şahiyan de li xwe dikirin jî ev yek anî ziman: Jinan û mêran tev cilên spî li xwe dikirin û diketin govendê. Jinan kofî girêdidan. Lê niha cil û berg hatine guhertin ango çanda xwe pêk naynin.
Koçer Xidir jî di vê roja pîroz da daxwaza berdana tevahî dilgirtiyan kir û xwest ku hemû Êzidî li dora hev kom bibin, warê xwe geş bikin, xwedî li hebûn û çanda xwe derkevin û got: Daxwaza me ewe, gorên komî bên vekirin û cenazeyên wan li malbatên wan bên vegerandin. Kesên ji Şengalê derketine vegerin ser cih û warên xwe.
