Li Stenbolê, bi wesîleya 1’ê Sibatê Roja Piştevaniya Rojava ya Cîhanê, ji aliyê Tevgera Jinên Azad (TJA), Partiya Wekhevî û Demokrasiyê ya Gelan (DEM Partî) û Kongreya Demokratîk a Gelan (HDK), ji Kolana Halitaga ya Kadikoya Stenbolê heta Kadikoy Bogayê meşek li dar xistin. Partiyên siyasî, saziyên civaka sivîl û bi hezaran kes tevlî meşê bûn. Di daxuyaniya piştî meşê de pankartên, “Civaka exlaqî û polîtîk wê çeteyan têk bibe”, “Bijî berxwedana Rojava”, “Şoreşa Rojava pek tê bê hêza ciwanan” û “Gelê Kurd yek ê Rojava rûmete” hatin vekirin.
Meş ji avahiya DEM Partî ya Kadokoyê heta peykera Ga dewam kir. Di daxuyaniyê de dirûşmeya “Bijî berxwedana Rojava” hatin berzkirin.
Ji rêxistina DEM Partî ya Stenbolê Arîfe Çinar di daxuyaniyê de axivî û diyar kir ku ew xwedî li berxwedana Rojava derdikevin û ew ê derkevin.
Berdevka DEM Partiyê Ayşegul Dogan jî di axaftina xwe de wiha got, “Roja dilê me ye, zîhnê me ye, dîroka me ye. Rojava dîroka azadî û berxwedanê ye. Ger em îro li Rojava bi ser bikevin, mafê Kurdan were parastin û qebûlkirin, wê Rojhilata Navîn bi ser bikeve. Em ê her tim xwedî li Rojava derkevin.
Em wekî DEM Partiyê dibêjin, ne şer, lê aştî. Hûn amade ne ku destê ku ji bo aştiyê hatiye dirêjkirin bigrin, hûn amade ne ku mafên Kurdan bi destûrî biparêzin, em amade ne. Em hêza xwe ji yekîtiya xwe digrin. Em her kesên ku li her derên cîhanê li ber xwe didin, silav dikin. Jin, Jiyan, Azadî.”
Pişte metna çapemeniyê ya hevpar ji aliyê Nurten Karagoz ve hate xwendin û wiha hate gotin, “Îradeya ku li Rojava derket, li dijî yekparêziyê piranîbûn, li dijî zextê jiyana azad û wekhev esas digre. Wekî ku Rêberê Gelê Kurd Abdullah Ocalan îfade kir, ‘Rojava ne tenê ya gelekî, manîfestoya azadiyê ya gelan, baweriyan û bi taybet ya jinan e. Tovên ku di 19’ê Tîrmeha 2012’an de hatin avêtin, îro bi ruhê piştevaniya kurewî ya 1’ê Sibatê re bû yek û li dijî pergalên navendî û desthilardarî nîşan kir ku alternatîfekî demokratîk pêkan e.”
Nurten Karagoz bilêv kir ku li dijî tifaq û planên qirêj ên dewletên netewe, li dijî destkeftiyên Rojava pêvjoyeke nû ya komployê hatiye destpêkirin û wiha got: “Parastina îrade û destkeftiyên li Rojava, ne tenê erkek ya piştevaniyê, ji bo gelên Rojhilata Navîn û cîhanê berpirsyariyeke dîrokî û civakî ye. Em bang li hemû hêzên demokrasiyê dikin ku vê mîrateya kûrewî biparêzin.”
Meşaleya azadiyê ya ku li Rojava teyisî, bi yekbûna stratejiya ‘Rêya Sêyemîn’ a Rêber Abdullah Ocalan, wê rêya jiyana demokratîk û azad nîşan bide. Em bi vê bawerî û biryardariyê 1’ê Sibatê Roja Piştevaniya Rojava ya Cîhanê silav dikin.”
Polîsan piştî daxuyaniyê êrîşî girseyê kirin û gelek kes binçavkirin.
