Rojnamevanên Bakur û Rojhilatê Sûriyeyê Newroz Demhat û Zinar Cafer têkildarî biryarên îdamê yên Îranê yên ji bo rojnameger Pexşan Ezîzî û aktîvîst Şerîfe Muhammedî û 3 sal cezayê li rojnamevan Silêman Ehmed hatiye birîn axivîn.
Rojnamevan Newroz Demhat kiryarên dijmirovahî yên li ser rojnamevan Pexşan Ezîzî û aktivîst Şerîfe Muhammedî û dîlgirtiyên di zindanan de şermzar kir û wiha got: “Em cezayên darvekirinê ne li ser hevalên xwe û ne jî li ser tu kesî qebûl nakin. Ji ber ku ne pîvanên exlaqî ne û li dijî mirovahiyê ne. Her wiha em cezayê ku li rojnamevan Silêman Ehmed hatiye birîn, bi tundî şermezar dikin.”
Newroz Demhat anî ziman ku serhildana ku di sala 2022’an de dest pê kir, zemîna pergala Îranê hejandiye û ev tişt got: “Serhildana ‘Jin, Jiyan, Azadî’ zemîna ku dewleta Îranê xwe li ser dida meşandin hejand. Ji ber vê bi girtin, çewisandin û darvekirina jinên aktivîst û siyasetmedar dixwaze jinan bêdeng bike. Lê îro şoreşa ‘Jin, Jiyan, Azadî’ ku bi pêşengtiya jinan destpê kir, ne tenê li Kurdistanê, belavî cîhanê bûye. Girtin û qirkirinên li ser jinan tê kirin nîşan dide ku pergala desthilatdar e ku bi hezaran salan e dixwaze xwe li ser piyan bigire, ber bi têkçûyînê ye. Têkoşîna jinan ku bi taybet bi Tevgera Azadiyê re destpê kir, îro diyar dike ku wê tu hêz nikaribe berxwedana jinê, pênûsa jinê têk bibe.”
Newroz destnîşan kir ku jinên li Îranê ti carî serî li hember pergalê netewînin û wiha got: “Pexşan, Ezîzî, Şerîfe Muhammedî, Warîşe Mûradî û gelek jinên ku niha di zîndanên Îranê de li ber xwe didin, nîşaneya wê yekê ne ku wê tu carî serî li hember vê pergalê neyê tewandin. Em hempişeyên wan, bi pênûs, kamera û nivîsanên xwe re li her derê, tevahiya cîhanê û Kurdistanê têbikoşin ku wê tu carî ev deng qut nebe. Ne darvekirin, ne girtin û ne jî çewisandin wê nikaribe pêşî li vê yekê bigire, Bi salan e diyar e ku xeta berxwedan, azadî û serketinê, xeta xiyanetê bin xistiye û wê dîsa bin bixe. Ji bo vê em heta dawî bi hempîşeyên xwe re ne.”
Newroz Demhat bal kişand ser cezaya li rojnamevan Silêman Ehmed hatiye birîn û wiha dawî li axaftinên xwe anî: “Cezaya ku ji aliyê dadgeha Dihokê ve li rojnamevan Silêman Ehme hatiye birîn, siyasî ye û ji bo veşartina rastiyên xwe ne, em vê cezayê şermezar dikin. Ji ber ku tişta ku PDK’ê dike hevkariya dewleta Îranê û Tirkiyeyê ye û her yek ji wan bi rêbazeke dixwaze siyaseta xwe li ser Kurdan bide meşandin. Îro li Bakurê kurdistanê, Rojhilat û Başûrê Kurdistanê rojnamevan tên girtin. Zextek mezin li ser rojnamevanên azadîxwaz heye. Tişta ku dikeve ser milên me ew e ku em heta dawî xwedî li têkoşîna hevalên xwe derbikevin.”
Rojnemevan Zinar Cafer jî bertek nîşanî kiryarên li dijî rojnamevan da û wiha got: “Ev demeke dirêj e ku dewleta Tirk hewl dide heqîqetê bi çewisîne. Ev yek bi hevkariya PDK’ê tê kirin. Ev demeke dirêj e ku rojnamevan Silêman Ehmed ji aliyê asayîşa PDK’ê ve hatiye revandin. Ev pergalekî ku li dijî Kurdan tê meşandin e. Ev yek li Rojhilatê Kurdistanê jî bi revandina Pexşan Ezîzî û Şerîfe Muhammedî ku hewl didan vê rastiyê bi her kesî re parve bikin, dewam dike.”
