Li navçeya Silopiya ya Şirnexê Newroz hate pîrozkirin. Li qada pîrozbahiyê pankarta bi nivîsa ‘Bi ruhê Newrozê em xwedî li banga civaka demokratîk derdikevin, Newroz pîroz be’ hate hildan. Jin, zarok û ciwan bi kincên neteweyî tevlî pîrozbahiyê bûn.
Ciwanên ku li ber dahol û zirneyê govend gerandin tim û tim dirûşma ‘Bijî Serok Apo’ qîriyan. Li gel êrîş û hişyariya polîsan jî li qada Newrozê tevahiya rojê dirûşma ‘Bijî Serok Apo’ hate qîrîn.
Çalakiyê bi deqeyeke rêzgirtinê ji bo bîranîna şehîdên têkoşîna demokrasiyê destpê kir. Bi navê Komîteya Amadekar a Newrozê gel hate silavkirin. Piştre endamên Meclîsa Dayikên Aştiyê derketin ser dikê û kevok firandin ku nîşaneya aştî û azadiyê ye. Her wiha xwestin, Newroza îsal bibe wesîleya aştî û azadiyê.
Ji TJA’yê Ayşegul Ayaz diyar kir ku banga dîrokî ya Rêber Apo manîfestoya jiyana nû ya sedsala 21’ê ye û got, “Em xwedî li vê bangê derdikevin û divê em hîn bêhtir têbikoşin. Dema ku jin bê rêxistin dimînin li malê asê dibin, têne qetilkirin û tundî li wan tê kirin. Azadiya jinan azadiya civakê ye. Ji ber vê yekê divê em hîn bêhtir têbikoşin. Em ê civaka demokratîk bi têkoşîna jinan ava bikin.”
Parlamenterên Şirnexê Newroz Ûysal û Mehmet Zekî Îrmez jî gel silav kirin. Berdevka DEM Partiyê Ayşegul Dogan jî got, “Îro dirûşma ‘Bijî Serok Apo’ li tevahiya Kurdistanê û Tirkiyeyê liqadan deng vedide. Hûn xwedî li Birêz Abdullah Ocalan derdikevin. Birêz Ocalan nêzî 30 sal in dixwaze li Rojhilata Navîn û Kurdistanê rêyeke nû, rûpelekî nû biafirîne. Şert û merc çi dibin bila bibin ti carî dest ji têkoşîna aştiyê, xwişk û biratiya gelan berneda. Botan amade ye, Botan dibêje xwişk û biratî, dibêje çareseriyeke mayinde. Ev Newroz navê jiyaneke nû ye. Tovên ku bi têkoşînê we beriya 50 salan çandin, îro şîn bûye û berheman dide. Divê hûn xwedî li vê derkevin.”
Piştî axaftinan agirê Newrozê ji aliyê Dayikên Aştiyê ve hate dadan.
Hunermend Mûrat Demîr û Koma Muzîkê ya Eyşe Şan hunera xwe pêşkêş kirin.
