Endamê Şandeya Îmraliyê ya Partiya Wekhevî û Demokrasiyê ya Gelan (DEM Partî) Sirri Sureyya Onder, di 3’yê Gulana 2025’an de ji ber krîza dil jiyana xwe ji dest da. Onder, di salvegera yekemîn a wefata xwe de li ser gora xwe ya li Goristana Zîncîrlîkuyu ya Stenbolê hat bîranîn. Malbata Onder û xizmên wî, Hevserokê Giştî yê DEM Partiyê Tuncer Bakirhan û endama Şandeya Îmraliyê Pervîn Buldan jî di nav de gelek siyasetmedar, hunermend, nûnerên rêxistinên civaka sivîl û bi sedan welatî tevlî bîranînê bûn.
Malbata Onder beşdar yek bi yek pêşwazî kir. Piştre Qur’an hat xwendin û dua hatin kirin. Keça Sirri Sureyya Onder Ceren Onder Kandemîr di bîranînê de axivî û spasiya beşdaran kir. Ceren Onder Kandemîrê got: “Îro heval û hogirên te hatine vê derê. Bi hevrêyên te re me destê hev girt. Dixwazim li cîhanê çi qewimî ye bi kurtasî bo te bibêjim. Me û hevrêyên te bi xurt destên hev girt, Can mezin bû, wêneyên te nîşanî hevalên te yên malê dide, li cîhanê şer derket, lê li welatê me israra aştiyê didome. Koma Amedê konser da, karkerên madenê bi greva xwe bi ser ketin, Amedspor derket Super Lîgê.”
Piştre jî Pervîn Buldan axivî û got: “Berî salekî li hezaran malan cenaze rabûn. Cihê Sirri tijî nabe. Neheqiye ku em bibêjin em te bi bîr tînin. Em sekn û mirovatiya te jî bi bîr tînin. Ji bo aştiyek birûmet pêk were te têkoşînek mezin da. Em soz didin ku em aştiyê bînin û diyarî te bikin.”
Hevserokê DEM Partiyê Tuncer Bakirhan jî destnîşan kir ku di demê herî zêde zext dihatin kirin de Sirriyê wan hebû û wiha axivî: “Bi saya kesên weke Sirri, em hatin van rojan. Dema ku herkes bêdeng bû Sirri axivî û baweriya aştiyê da me. Sirri aştî dikir aştî. Em soz didin ku ‘em aştiyê bînin vî welatî.’ Hemû kesên ku ji bo aştiyê têkoşiyane û jiyana xwe ji dest dane, bi bîr tînim.”
Bîranîn piştî axaftinan bi dawî bû.
