Pêşnûmeya qanûna çarçoveyê ya bi navê “Xurtkirina Yekbûna Civakî û Piştevaniya Mîllî” ku di çarçoveya Pêvajoya Aştî û Civaka Demokratîk de hate amadekirin, piştî ku radestî Serokatiya Meclîsê hate kirin li Komîsyokna Edaletê hate qebûlkirin.
Parêzerê Îtalî Ezio Menzione ku pêvajoyê ji nêz ve dişopîne li ser pêşnûmeya qanûna çarçoveyê ji ANF’ê re axivî.
Parêzer Menzione anî ziman ku piştgiriya hemû partiyan a ji bo pêşnûmeya qanûna çarçoveyê erênî ye, vê qanûnê pêvajo derbasî ser zemîneke hiqûqî û siyasî kiriye û got, “Bi dîtina min ev qanûna çarçoveyê xerab nîne. Piştgiriya hemû partiyan, partiyên muxalîf jî cihê silavkirinê ye.”
Ezio Menzione diyar kir ku divê bi şênberî bê nîqaşkirin ku ji niha û pê ve wê çi bê kirin û axaftina xwe bi vî rengî dewam kir, “Êdî dem nema ye ku bi rengekî giştî bê nîqaşkirin. Ji niha û pê ve divê her nuqteyek di çarçoveya perspektîfa hiqûqî û siyasî de bê nirxandin; ji ber ku pêşvebirina pêvajoya aştî û civaka demokratîk û biserxistina armancên wê bi vî rengî dibe.”
Ezio Menzione destnîşan kir ku divê Meclîs qanûnê erê bike, sererastkirinê qanûnî bike û got, “Ji bo bicihanîna qanûnê pêwîstî bi hin sererastkirinên din heye. Lê belê ev yek destpêkeke baş e.”
Parêzer Menzione diyar kir ku yek ji kêmasiyên herî girîng ên pêşnûme qanûna çarçoveyê û yek ji nuqteyên wê yên krîtîk diyarnekirina statuya Rêber Apo ye û got, “Nayê qebûlkirin ku Ocalan li derveyî qanûnê, yanî li derveyî derfetên ku pêşnûme qanûn pêşkêş dike bê hiştin. Ev rewşeke cihê xemgîniyê ye, gelekî neyînî ye. Ev nuqteya herî krîtîk e, ji ber ku Ocalan di tevahiya pêvajoyê de aktorê sereke ye. Dervehiştina Ocalan a li pêvajoyê bû rewşeke nediyar bê pêvajo çawa bê pêşvebirin.”
Ezio Menzione ragihand ku tevlîkirina Ocalan li pêvajoyê û zelalkirina statuya wî girîng e û got, “Bêyî Ocallan pêvajo wê çawa dewam bike; zehmet e ku mirov li vê yekê bifikire. Destpêkê ji bo Ocalan girtîgeha malê dikare bibe. Girîng e ku Ocalan di asteke welê de be ku karibe li ser pêvajoyê bixebite ku du salên dawî vê yekê dike. Di ser destpêkirina pêvajoyê re du sal derbas bûn. Hêvîdar im wê statuya Ocalan diyar bibe. Ji ber ku li Îmraliyê nikare li gorî pêwîstiya pêvajoyê rêbertiyê ji gelê Kurd re bike. Ocalan ne tenê lîderê PKK’ê ye, divê weke lîderê hemû Kurdan bê dîtin.”
Ezio Menzione her wiha rexne kir ku mijara danîna çekan û erka piştrastkirina vê yekê ji Desteya Ewlekariya Mîllî re tê hiştin û got, “Diviyabû li şûna desteyeke ser bi hikumetê ev wezîfe ji desteyeke taybet a parlamenteran re bihata hiştin.”
Parêzer Menzione got, “Danîna çekan, piştrastkirina vê yekê û berdana muxalîfan divê weke pêvajoyê ji hev cuda neyên dîtin” û axaftina xwe bi vî rengî dewam kir, “Bi dîtina min divê ev hemû di heman kêliyê de pêk werin. Ev yek wê pêvajoyê xurtir bike. Berdana muxalîfan wê danîna çekan xurt bike.”
Menzione destnîşan kir ku qanûn tenê beşek ji pêvajoya aştiyê ye û got, “Gelek mijarên civakî hene ku di nava pêşnûmeyê de cih negirtine. Li bo pêkanîna aştiyeke mayinde li gel danîna çekan û sererastkirina hiqûqî, meseleyên mercên civakî yên Kurdan, ziman û meseleyên din ê civakî divê ji sernavên sereke yên pêvajoya aştiyê bin. Ji niha û pê ve şêweyê derketina qanûnê ji Meclîsê û pêkanîna guhertinên têne hêvîkirin wê ji bo paşeroja pêvajoyê diyarker be.”
