Li gorî nûçeya ANHA’yê, ji şevê din heya berbanga îro li gundewarên rojhilatê Dêrazorê operasyoneke ewlehiyê li dar ket. Şahidan diyar kir ku operasyona serdegirtinê û lêgerîna li çeteyan li gelek gund û taxên rojhilatê kantonê, bi taybetî li bajar û gundên Xeranîcê pêk hat.
Şahidan da zanîn ku hêzên leşkerî û ewlehiyê yên beşdarî operasyonê bûbûn, vegeriyan baregehên xwe, tenê yên ewlehiyê li ser bendên ewlehiyê mane.
Navenda Ragihandinê ya Hêzên Sûriyeya Demokratîk (QSD) der barê operasyonê de daxuyaniyek weşand.
Di daxuyaniyê de hate diyarkirin ku 4 şervanên meclisê ku roja çarşemê ji aliyê şaneyê ve ku tê texmînkirin girêdayî çeteyên DAÎŞ’ê ne hatibûn revandin, hatin rizgarkirin.
Di daxuyaniyê de hate destnîşankirin ku hêzên wan ji bo serbestberedana şervanên revandî operasyonek pêk anî. Her wiha daxuyand ku operasyon heta qedandina tevahî endamên şaneyê dewam dike.
Navenda Ragihandinê ya Meclîsa Leşkerî ya Dêrazorê 14’ê Tebaxê daxuyaniyeke niviskî weşandin. Di daxuyaniyê de hatibû gotin komeke terorîst ku tê texmînkirin şaneyên DAÎŞ’ê ne, 13’ê Tebaxê êrişî 4 şervanên meclisê kir. Li gorî daxuyaniyê êriş li bajarokê Hew Hewayîc a rojhilatê Dêrazorê hat kirin dema ku her çar şervan ji bo tedawiyê diçûn dermanxaneyê.
Her wiha hate gotin: “Hêzên me operasyoneke leşkerî ya bibandor da destpêkirin. Di encamê de çekdarek hat kuştin û 3 jî birîndar bûn. Operasyon li gorî planê dewam dike. Her êrişek li dijî endamên me yan jî li dijî şêniyên herêmê dê bê bersiveke dijwar nemîne.” Di daxuyaniya berê de hate aşkerakirin ku der barê êrişê û ji bo diyarkirina berpirsên wê lêkolîneke berfireh hatiye destpêkirin.
