Navenda Ragihandinê ya QSD’ê derbarê bîlançoya 24 saetên dawî ya êrîşên dewleta Tirk a dagirker û çeteyên bersivdayînê yên şervanan de ev agahî dan:
“Êrîşên dewleta Tirk a dagirker û çeteyên wê yên li ser herêmên Bakur û Rojhilatê Sûriyeyê 3 meh in li pey hev dewam dikin. Hêzên me jî li dijî êrîşan çalakiyên bersivdayînê didomînin û derbên giran li çete û dagirkeran didin.
Eniya Qereqozaqê; şervanên YPJ’ê li hemberî êrîşên dagirker û çeteyan çalakiyek li rojavayê Pira Qereqozaqê li dar xist. Çalakî li dijî kombûn û stargehên dagirker û çeteyan hatin lidarxistin û di encamê de 8 çete hatin kuştin û yek birîndar bû. Di çalakiyek din de radarek, baregehek û kamereyek ên dagirkeran hatin rûxandin. Çete û dagirkeran bi zêdetirî 80 guleyan gundên Tîna, Cada, Bîr Hiso, Xeseq, Dîkan, Melha û Sina, girên Sêvê û Qereqozaqê bi obîsên giran, tank, roket û hawanan topbaran kirin. Di encama van êrîşên bê serûber de zerarên madî yên mezin li mal û milkên şêniyan bûn.
Eniya Bendava Tişrînê; balafirên şer rêze êrîş li gundewarê başûrê rojhilatê Minbicê pêk anîn û bi şev û roj herêm dan ber topan. Ji ber êrîşan zerarên madî li gundan bûn. Komeke çeteyên dewleta Tirk a dagirker ji xetên pêşîn ên bajarokê Ebû Qeqel hewl dan êrîşî nuqteyên şervanên me bikin. Bi destpêka êrîşa li ser derdora girê Syrialet (Saet 04.00’an) re şervanên me bersiv da û şer derket. Di encamê de 6 çete hatin kuştin û hin din birîndar bûn.
Eniya bakurê Bendava Tişrînê; hêzên me li kombûnên çeteyan dan. 2 çete hatin kuştin û motorsiklêtek hat rûxandin. Dema çeteyan hewl dan cenazeyên kuştiyên xwe ji qadê rakin erebeya wan derb xwar û çete ji qadê reviyan.
Yekîneyê Şehîd Harûn saet 15.00’an li wesayîteke zirxî ya çeteyan da; wesayît bi temamî hat rûxandin û 2 çete hatin kuştin.
Eniya Dêr Hafir; balafirên bê mirov ên dewleta Tirk a dagirker di tevahiya rojê de li asîmanê herêmê digeriyan. Dagirkeran bi 3 dronên xwekujî nuqteyên hêzên me bombebaran kirin. Di encamê de zerarên madî tenê çêbûn.
Bîlançoya duh: 18 çete hatin kuştin û hin birîndar bûn, her wiha yek jê zirxî 2 erebeyên leşkerî û motorsîklêtek hatin rûxandin.”
