Hevseroka TEV-DEM’ê Remziye Mihemed ji ANF’ê re axivî û diyar kir ku Rêber Apo di pêvajoyeke pir hesas de ev banga dîrokî kir û bal kişand ser girîngiya vê bangê.
Remziye Mihemed anî ziman ku ev ne cara yekem e ku ji aliyê Rêber Apo û PKK’ê ve banga çareseriyê tê kirin û wiha got, ”Beriya vê di salên demdirêj de gelek caran Rêber Apo û Partiya Karkerên Kurdistan xeta çareseriyê pêşkêş kirin. Banga Rêber Apo ya ji bo aşîtî û demokrasiyê ne tenê ji bo gelê Kurd e, ango çareseriya Pirsgirêka Kurd-Tirk e. Eger berjewendiyên gelan ber çav were girtin, wê pirsgirêk jî çareser bibin.”
Remziya di berdewamiya axaftina xwe de destnîşan kir ku banga aştiyê ji bo avakirina aşîtî û rakirina dagirkeriyê ye û wiha domand, ”Ev banga aşîtî û demokrasiyê wê bi xwe re aşîtiyê di nav civakan de ava bike, wê dagirkeriyê rake û wê civak mafên xwe bi dest bixin û wê bikaribin çand û nasnamaya xwe bi dest bixe. Gelê Kurd divê di cîhanê de xwedî îrade be, ji berê heta niha siyaseta qirkirinê li ser gelê Kurd tê meşandin. Ji bo wê jî dema ku xitimandinek di cihekî de çêbibe, divê çareseriyek ji wê xitimandinê re bê dîtin. Ev çareserî jî tu carî bi şer, kuştin û çekan nayê. Li hemberî vê pêvajoyê her kes berpirsyar e.”
Hevseroka TEV-DEM Remziye Mihemed anî ziman ku bangên aştiyê yên ku heta niha hatine kirin, tenê yek alî diman û wiha pêde çû: ”Ev bangên aştiyê ku ji salên berê de û heta niha ji aliyê Rêber Apo ve hatine kirin, her tim yek alî man. Dewleta Tirk berpirsyarî nedigirt ser milê xwe. Ji ber ku sîstema netew dewlet tenê dixwaze sîstema xwe bi rengê xwe bide meşandin. Lê projeya Rêber Apo rêya çareseriyê di nav xwe de dihewîne, dema ku gel hebûn û îradeya xwe di projeyekî de dibîne, berê xwe dide wê projeyê. Projeya Rêber Apo hebûn û îradeya gelan di nav xwe de dihewîne.
Li hember banga aştî û demokrasiyê ya Rêber Apo, gelek berpirsyariyên dewleta Tirk hene. Bangawazî hat kirin û ji bo çareseriyê jî Rêber Apo gelek xalên girîng pêşkêş kir. Pêvajo hatiye destpêkirin, divê gav bên avêtin. Yek ji wan gavan; divê Rêber Apo bikare bi civakê re diyalogê bike, li kêleka wê divê dewleta Tirk şer bide sekinandin. Divê dewleta Tirk gavên cidî û girîng bavêje da ku aramiyek were avakirin.”
