Li navçeya Sûrê ya Amedê li Konaxa Cemîl Paşa, di çarçoveya 6’ê Îlonê Roja Çapemeniya Azas de bernameyek hat lidarxistin. Bername bi pêşengiya Komeleya Rojnamegerên Jin a Mezopotamyayê (MKH) û Komeleya Rojnamegerên Dîcle Firat(DFG) pêk hat. Ligel rojmnameger û malbatan, malbata rojnameger Gulîtsan Tara, aktîvîstên TJA’yê, Hevserokê Giştî yê Partiya Herêmên Demorkatîk (DBP) Keskîn Bayindir, hevşaredarên DEM Partiyê, nûnerên DEM Partî û DBP’ê yên navend û navçeyan tevlî bûn.
Di bernameyê de sînevîzyonek ku mijara wê kedkarên çapemeniyê bû hat nîşan dan. Rojnamegerên hatine qetilkirin hatin bibîranîn û piştî deqeyeke rêzgirtinê dirûşmeyên ‘Şehîd Namirin’ hat berzkirin.
‘WÊ PÊNÛSA WAN LI ERDÊ NEMÎNE’
Ewil seroka MKG’ê Roza Metîna axivî û rojnamegerên ku di riya heqîqetê de jiyana xwe ji dest daye bi bîr anî. Roza Metîna got, “Têkoşînek mezin ji me re hiştin. Em hêza xwe ji wan û têkoşîna wan digirin. Em îro wan bi bîr tînin.”
Roza Metîna bal kişand ser darbeya 12’ê îlonê û da xuyakirin ku hîna şopa wê didome û ev tişt anî ser ziman: “Hîna duh malpera rojnameya Yenî Yaşamê hat astengkirin. Em îro li vir in û li dijî zîhniyeta darbeyê ne. Em ê di riya heqîqetê de berdewam bikin. Hîna gelek hevalên me girtîne. Bila ev roj bibe wesîleya azadiya rojnamegeran û civaka demokratîk. Em soza xwe dubare dikin. Em ê pênûsa hevalên xwe li erdê nehêlin. Em ê xwedî li bîranîna Cîhan Bîlgîn, Nazim Daştan, Gulîstan Tara, Hêro Bahadîn, Egîd Roj, Nagîhan Akarsel û hevalên din derkevin.”
DFG: BERDÊLÊN MEZIN HATIN DAYÎN
Hevseroka DFG’ê Kesîra Onal jî mafê axaftinê kir û wiha got: “Em dizanin ku kokên çapemeniya azad ji ku derê tê û çi îfade dike. Pêvajoyeke ku her hevalek me bi jiyana xwe bedel daye. Em îro bi saya wan li vir in. Hevalên me di şertên giran de têkoşîn dan û bedel dan. Di vê pêvajoyê de em dixawzin girîngiya çapemeniya azad bînin ziman. Divê zextên li ser çapemeniya azad rabin.”
Hevserokê Giştî yê DBP’ê Keskîn Bayindir jî axivî û da zanîn ku çapemeniya azad bîra gelê Kurd e û roja çapemeniya azad pîroz kir. Hevşaredarê Bajarê Mezin yê Amedê Dogan Hatun jî axaftinek kir û got li ku derê nûçeyek rast hebûye çapemeniya azad li wir bûye û got: “Bila roja we carek din pîroz be. Her tim azad bin.”
Piştî axaftinan hunermend Kasim Taşdogan derket ser dîkê. Bername bi stran û govendê berdewam kir.
