Festîvala ku bi boneya 76’emîn rojbûna Rêber Apo bi pêşengiya Platforma Saziyên Demokratîk ve 2 rojan li navçeya Xelfetî ya Rihayê hat lidarxistin, li Amarayê dewam kir. Piştî meşa ku bi pêşengiya jinan ber bi gundê Amarayê ve hat lidarxistin, li hewşa mala ku Rêber Apo ji dayik bû pîrozbahiya 4’ê Nîsanê hat lidarxistin.
Girse dema gihîşt gundê Amarayê, posterê mezin ê Abdullah Ocalan ku roja 27ê Sibatê li Girtîgeha Îmraliyê hatibû kişandin rakir û bi berzkirina dirûşmeyên, “Rojbûna te pîroz be ey Serok Apo”, “Bijî Serok Apo”, “Dinyayeke bê Ocalan em ê bi ser wê de hilweşînin” , “Şehîd namirin”, “Ciwan fedayiyên Rêber Apo ne” ketin hewşa mala Abdullah Ocalan ku lê dayik bûye. Li malê Mehmet Ocalan û Omer Ocalan û xizmên Rêber Apo, girseyê pêşwazî kirin.
Piştre girse derbasî hûndirê malê bû û li vir dirûşme hatin berzkirin. Her wiha ciwanan jî wêneyê mezin ê Abdullah Ocalan li banê xanî daliqandin. Ciwanan demek dirêj li ser banê xanî dirûşm berz kirin û piştre jî li hewşa malê panelek hat lidarxistin.
Di panelê de ewilî Mehmet Ocalan axivî û bi xêr hatina mevanan kir. Mehmet Ocalan wiha got: “Serok di hevdîtina dawî de silavên xwe ji gel re û ji ciwanan re şand. Serok dibêje, ‘Divê ciwan ji provakasyonan re hişyar bin. Rêya me rêya dirêj e’. Bi aqilekî baş pirsgirêk dikare çareser bibe. Yê ku vê pirsgirêkê çareser bike jî Serok e. Rojbûna Serok pîroz be. Em spasiya hemû kesî dikin û mala we hemûyan ava.”
Endama Koma Aştiyê Avesta Gulîstan Uçar jî wiha axivî: “Çend roj in meşa me berdewam dike. Heta azadiya fizîkî ya Serokê me pêk were meşa me wê bidome. Em rojbûna Serok Apo weke rojbûna mirovahiyê dibînin. Jin û ciwan bîrdoziya birêz Abdullah Ocalan esas digirin. Em jî weke jin û ciwanan bi vê yekê serbilind in ku rêwiyê vê dozê ne.”
‘PANELA LI SER DÎROKA VEJÎNÊ’
Rojnamevan-nivîskar Haydar Ergul ku hevalê Rêber Apo ye, bîranînên xwe yên bi Rêber Apo re anîn ziman û wiha got: “Hatina li vir pir bi watedar e. Di dîroka hemû civakan de kesayetên girîng hene. Di dîroka Kurd de jî kesayetên wisa derketine. Lê piştî sed salan di meha Nîsanê de keseyetekî wek Serokatî ji dayik bûye. Serokbûyîn ne karekî hêsan e. Hele ku li Kurdistanê avakirina partiyeke û meşandina doza azadiyê qet û qet ne hêsan e. Ne weke îro bû. Wê demê Kurdbûyîn wekî ‘heqaret’ didîtin. Lê niha ne wisa ye Serokatî keseyetekî mezin e.”
Piştrê jî Haydar Ergul di berdewamiya axaftina de bîranînên xwe yên li gel Rêber Apo anî ser ziman. Haydar Ergul qala pêvajoya komploya navneteweyî jî kir û destnîşan kir ku pêvajoya Romayê di jiyana wî de pêvajoya herî dijwar bûye.
Piştî axaftina Haydar Ergul panel bi pirs û bersivan bi dawî bû. Piştî panelê li hewşa xanî bi berzkirina dirûşmeyan bernameya pîrozbahiye bi dawî bû.
