Berdevka DEM Partiyê Ayşegul Dogan anî ziman ku biryara Komîsyona Çareseriyê ya Meclîsê ya ji bo çûyîna Îmraliyê û dîtina Rêber Apo, ji aliyê aktorên siyasî ve weke xaleke werçerxê ya dîrokî hate nirxandin, lê “biryareke derengmayî ye”.
Ayşegul Dogan destnîşan kir ku ji bo pêşveçûna pêvajoyê û aştiya mayînde, hevdîtina bi Rêber Apo re neçariyeke stratejîk e. Her wiha bi hûrgûlî behsa neçariya stratejîk a li pişt biryarê kir û bal kişand ser rola Rêber Apo ya ji bo pêşveçûna pêvajoyê.
Ayşegul Dogan îşaret bi gava PKK’ê ya şewitandina çekan kir û destnîşan kir ku ji bo veguherîna demokratîk rola Rêber Apo pir girîng e.
Ayşegul Dogan anî ziman ku pêşdîtinên Rêber Apo yên ji bo Rojhilata Navîn wê tevkariyeke cidî ji bo çareseriya pêvajoyên şer bike û got, “Ev kanûn derfet e; tişta ku vê derfetê xurt bike, xebitandina hemû mekanîzmayên pêwîst e û ji vir û şûnde jî ti kes ji vê nereve.”
‘BIRYARA CHP’Ê, REDKIRINA MÎSYONEKE DÎROKÎ YE’
Dogan diyar kir ku biryara CHP’ê ya tevlînebûna heyetê, xaleke şkestinê ye û ev biryar weke redkirina mîsyoneke dîrokî şîrove kir.
Ayşegul Dogan destnîşan kir ku CHP’ê mîsyona xwe binpê kir û diyar kir ku divê pêvajo zelal bimeşe, di bin sîwana Meclîsê de be û siyaset biryarê bide.
Ayşegul Dogan daxuyaniya Serokê Giştî yê CHP’ê Ozgur Ozel a “Me got pirsgirêka Kurd heye û em li wir disekinin” têrker nedît.
Ayşegul Dogan diyar kir ku di dema pêşiya me de sererastbûnên qanûnî û zemînê hiqûqî li gorî pêdiviya pêvajoyê berpirsyariya lezgîn dide hemû aktorên siyasî û got, “Ji bo afirandina aştiya mayînde, jiyaneke wekhev, adilane û bi rûmet û em hemû di civakeke demokratîk de kom bibin, wezîfe dikeve ser milê partiyên siyasî û me hemûyan.”
