Roja 27’ê Çileya 2025’an dewleta Tirk a dagiker bi balafirên bê mirov û bombekirî wesayîteke sivîl li Gundê Girdcan li nêzîkî bajarokê Çarqurne ya ser bi navçeya Ranya ya girêdayî îdareya Raperîn bombe kiribû. Di êrişê de 4 sivîl şehîd bûn. Yek ji van jî Rojnamevan Azîz Koyluoglu bû.
Bi boneya yekemîn salvegera şehadeta hevrêyê me, li ofîsa ajansa Rojnews a li Silêmaniyê merasîmek bîranînê hate lidarxistin. Di merasîmê de hevrêyên Azîz amade bûn. Merasîm bi deqeyek rêzgirtinê destpê kir.
Piştre li ser navê xebatkarên ajansa Rojnewsê Soma Xalid peyamek pêşkêş kir û got, “Şerê bi pênûsê qasî têkoşîn û şerê bi çek girîng û bi bandore. Divê serdema em têde derbaz dibin, pênûs bûye hêza herî mezin ya guherîn û veguherînê. Bê guman şerê ragihandina rastiyê, mîna çirûskek di tarîtiyê deye ku çavên dijminên Kurdan, qet nikarin li hemberî ronahiya vê rastiyê besekine. Ezîzê me hertim bê cudahî ronahiya rastiya civakê di çavên dijmin û dagirkeran de digirt.
Belê ev rastiya hevrê û mamostayê me Azîz bû ku hemû temenê xwe ji bo têkoşîna ji bo gelê xwe veqetand. Westan nedizanî, bê ku bifikire hertim rastiya heyî ji cîhanê re radigihand.
Hevrêyê me yê hêja Azîz Koyluoglu dirêya gihandina heqîqetê de şehîd bû, ew gihişt rêya xwe ya pîroz û em soz didin ku emê armancên wî pêkbînin. Em ji dijmin re dibêjin, we ezîzên me şehîdxistin, me soz daye ku em ji bo azadiyê û gihandina rastiyê, bibin Azîz Koyluogluyên din.”
Piştre rêveberê giştî yê Kompanyaya Çetir Kemal Hem Reza axivî û got, “Şehîd Azîz rêya heqîqetê bû û ji bo gelê xwe xebat kir. Şehîd Azîz kesayetek diyar û rojnamevanek biwêrek û bandor bû. Bi dehan rojnamevan fêr kir.”
Erkan Mihemed ê hevrêyê şehîd Azîz Koyluoglu jî axivî û got, “Mixabin di rojek weke ya îro de heval Azîz hate şehîdxistin. Ev nayê bîrkirin, di dema min pêre kar dikir de, gelek jê bandor bûm û di warê ragihandina azad de, ji bo gihandina ciwanan akademiyek bû. Em deyndarê wî ne.”
