Serokwekîlê Koma Meclîsê ya DEM Partiyê Sezaî Temellî çareseriya demokratîk a meseleya Kurd nirxand û bal kişand ser polîtîkayên têkildarî Sûriyeyê.
Temellî anî ziman ku polîtîkaya Tirkiyeyê ya têkildarî Sûriyeyê û nêzîkatiya wê ya herêmî bandoreke yekser li pêvajoya çareseriyê dike û ragihand ku nabe ku pêvajo tenê di nava sînorên Tirkiyeyê de bê nirxandin. Sezaî Temellî işaret bi aliyên herêmî û navneteweyî yên meseleya Kurd kir û rexne kir ku polîtîkayên têkildarî Sûriyeyê bi ferasetên ewlekariyê yên berê tê meşandin.
Temellî ragihand ku dema qala çareseriya demokratîk a meseleya Kurd bê kirin divê hemû dînamîkên vê cografyayê û navneteweyî li ber çavan bê girtin û got, “Dema ku mirov bi taybetî bala xwe didin ser mijara nêzîkatiya li Sûriyeyê, tê dîtin ku feraseta siyaseta berê, kodên siyasî yên berê hîn bi bandor e. Yanî çareseriya demokratîk a meseleya Kurd li aliyekî, em bi tabloyeke welê re rû bi rû ne ku meseleya Kurd hîn tine tê hesibandin û hewl tê dayin ku feraseta berê ya li Tirkiyeyê derbasî Sûriyeyê bê kirin. Ev yek jî tiştekî bê qebûlkirin nîne. Mesele meseleyeke hevgirtî ye. Ev pêvajo divê bi Sûriye, Iraq, Îran, Tirkiye û dîasporayê bê nirxandin. Bêguman li her deverê heman rêbaz nikare bê bikaranîn, lê belê girîng e ku bi hevgirtî bê nirxandin.”
‘DIVÊ ALÎ HEVDU TINE NEHESIBÎNIN, EV YEK ÇARESERÎ NÎNE’
Sezaî Temellî bersiv da daxuyaniyên dawî yên Serokê Giştî yê MHP’ê Devlet Bahçelî yên li ser meseleya Sûriyeyê û Kurdan. Temellî gotinên bi naveroka şer ên Bahçelî rexne kir û anî ziman ku çareserî di rêbazên leşkerî de nîne, lê di muzakere û diyalogê de ye û li ser pêvajoya ku hem li Tirkiyeyê hem jî li Sûriyeyê divê bê meşandin got, “Daxuyaniyên doh mixabin daxuyaniyên bêşens bûn. Axaftina li ser rêya şer tevkariyê li çareserkirina meseleyê nake. Tişta herî girîng a ku tevkariyê li çareseriya meseleyê bike muzakere û diyalog e.
Çawa ku hewl tê dayin ku li Tirkiyeyê muzakere bê meşandin, li Sûriyeyê jî divê rêya sereke muzakere be. Timî qala Mutabaqata 10’ê Adarê tê kirin. Ji bo Mutabaqata 10’ê Adarê bi rastî bibe mutabaqatek divê hurmet ji mafên muzakereyê yên aliyan re bê nîşandan.
Li ser bingeha mafên muzakereyê divê pêvajo bi rêya diyalogê bê meşandin. Naxwe tinehesibandina hevdu ya aliyan û ferzkirina nexweşiyên ji ber feraseta yekperest a li Sûriyeyê çareserî nîne.”
