TJA’yê li Êlih, Mêrdîn û Rihayê bi daxuyaniyan û meşan dest bi çalakiyên bi dirûşma ‘Bi civaka demokratîk ber bi jiyana azad a bê tundî ve” kir. TJA’yê li dijî qirkirina jinê û tundiya mêr-dewletê banga mezinkirina têkoşînê kir.
ÊLIH
Li Êlihê jin li Kolana Huenrê li hev kom bûn û bi dirûşma “Jin, Jiyan, Azadî” meşiyan. Zeynep Aslan a TJA’yî diyar kir ku jin ji aliyê dîrokî ve hatiye tepisandin û li seranserê cîhanê her sal bi deh hezaran jin ji aliyê sîstema bi serweriya mêr ve têne qetilkirin.
Hevşaredara Êlihê Gulistan Sonuk a ji wezîfeyê hate dûrxistin, polîtîkayên qeyûm weke “tundiya dewlet a mêr” pênase kir û anî ziman ku wê têkoşîna xwe dewam bikin. Gulistan Sonuk got, “Di avakirina civaka demokratîk de divê her kes bi berpirsyariya xwe rabe. Qeyûm jî tundiyeke mêr dewletê ye. Bêkariya ku li ciwanên me hatiey ferzkirin, fûhûş û narkotîk jî tundî ye. Em ê li dijî vê tundiyê têkoşîna xwe dewam bikin.”
DÊRIK
Li navçeya Dêrikê ya Mêrdînê jin bi pankart û dirûşmên xwe meşiyan. Bi navê TJA’yê Eylem Amak daxuyanî da û bi bîr xist ku li Tirkiyeyê hejmara kuştina jinan zêde dibe. Eylem Amak ragihand ku tundiya mêr dewletê xwe ji polîtîkayên dewletê xwedî dike û got, “Em jin, hem xwedî berxwedana rabirdûyê ne, hem jî hêviya paşerojê ne. Em ê bi ruhê 25’ê Mijdarê li dijî tundiya mêr dewletê têkoşîna xwe bi biryardarî dewam bikin. Heta ku jiyaneke ji wekhevî, azadî û aştiyê ava bikin em ê li qadan, kolanan û li her qada jiyanê bin.”
Hevşaredara Dêrikê Songul Ozbahçecî jî destnîşan kir ku wê jinan bi tenê nehêlin. Hevşaredara Bajarê Mezin a Mêrdîn Devrîm Demîr diyar kir ku wê li her qadê bi berxwedana jinan xwe bigihînin azadiyê.
Parlamentera DEM Partiyê Salîha Aydenîz jî got, “Weke jin em ê pêşengiyê hem ji azadiyê hem jî ji civaka demokratîk re bikin.”
RIHA
Li navçeya Hîlwan a Rihayê daxuyaniyek hate dayin û wêneyên jin û zarokên ji aliyê mêran ve hatin kuştin, hatin hildan. Aktîvîsta TJA’yê Başak Saridal got, ew ê bi felsefeya “Jin, Jiyan, Azadî” têkoşînê dewam bikin.
