Şêniyên bajarê Qamişlo û gundewarê wî cenazeyên şervanê Hêzên Sûriya Demokratîk (QSD) Reşo Qamişlo (Hecar Mihemed) û Kemal Qamişlo (Delîl Cemîl Hebîb) li Pakrewangeha Şehîd Delîl Saroxan veşartin. Reşo Qamişlo di bersivdana êrîşên artêşa Tirk a dagirker ên li dijî Bendava Tişrînê de di 4’ê Sibatê de şehîd bû û Kemal Qamişlo jî di 4’ê Adarê de dema li ser erka xwe bû, şehîd bû.
Di merasîma oxirkirinê de endamê Meclisa Malbatên Şehîdan Mihemed Emîn Îbrahîm axivî û got: “Ne pirtûk ne pênûs dikarin fedakariyên şehîdan ên di oxira parastina vî gelî de wesif bikin.”
Meclisa Malbatên Şehîdan beriya çend hefteyan merasîmeke xiyabî ji şehîd Reşo Qamişlo re li dar xistibû, lê ji bo ku cenazeya wî bînin hevrêyên wî berxwedaneke lehengane raber kir.
Li aliyekî din jî fermandarê QSD’ê Nezîr Sofî got: “Şehîd Reşo û Kemal ji şervanên pêşîn ên ku parastina xakê kirine.”
Sofî wiha domand: “Çawa em di Kobanê de bi ser ketin, em ê di Bendava Tişrînê de jî bi ser bikevin.”
Her wiha fermandarê QSD’ê Şivan Mihemed jî axivî û fedekariyên şehîd Kemal anî ziman û got: “Şehîd Kemal ji şervanên pêşîn ên ku parastina xaka xwe kiriye, ye.”
Mihemed wiha domand: “Em bang li gelê xwe dikin ku li kêlek hêz û zarokên bin, ji ber ku serkeftin para me ye.”
Di dawiyê de wesîqeyên her du şehîdan hatin xwendin û radestî malbatên wan hatin kirin.
