Yekîtiya Ewropayê paketa reformê nekarî erê bike ku di paketê de polîtîkayên têkildarî koçberiyê bi bingehînî tê guhertin û destûr tê dayin ku li welatên derveyî Yekîtiya Ewropayê “navendên vegerandinê” bêne avakirin.
Roja Pêncşemê hevdîtin hate kirin û welatên endamên Yekîtiya Ewropayê û Parlamenta Ewropayê di mijara dema meriyetê ya pêşnûme qanûnê de li hev nekirin. Aliyan ji bo bidawîkirina pirsgirêkên dawî biryar dan ku muzakereyan taloqî 1’ê Hezîranê bikin. Hate ragihandin ku li gel vê yekê jî di çarçoveya giştî ya reformê de li ser prensîbê lihevkirin pêk hatiye.
Li gorî vê guhertina di rojeva Yekîtiya Ewropayê de ye û bûye cihê nîqaşê, wê koçber li navendên li derveyî Ewropayê bêne ragirtin û pêvajoyên dersînorkirinê ji van navendan bêne meşandin.
Danîmarka, Awûstûrya û Elmanya piştgiriyeke xurt didin fikrê “navendên vegerandinê”. Hate gotin, hîn beriya erêkirina fermî ya Yekîtiya Ewropayê hin welatên Ewropayê dest bi amadekariya avakirina cihê van navendan kirine.
Ji bo navendên gengaz jî navê Ruanda, Uganda û Ozbekistan derbas dibe.
Komîsyona Ewropayê beriya salekê model xistibû rojevê. Di nava paketa reformê de tedbîrên cuda jî hene ku hejmara koçberên ji Ewropayê têne dersînorkirin gelekî zêde dike.
Rêxistinên mafên mirovan hişyariyê didin ku ev plan ji aliyê hiqûqa navneteweyî û mafên mirovan ve dikare pirsgirêkên cidî bi xwe re bîne.
