Yekîtiya Ewropayê (YE) 7 welatan wekî “bi ewle” diyar kir ku ji bo vegera koçberan lez bike û serlêdana penaberiyê ya welatiyên van welatan ji bo welatên YE’yê zehmet bike. Komîsyona Ewropayê diyar kir ku wan pêşniyar kirine ku Kosova, Kolombiya, Fas, Tunus, Misir, Bangladeş û Hindîstanê wekî “bi ewle” were diyarkirin.
Komîserê Koçberan yê YE’yê Magnus Brunner anî ziman ku gelek welatên endam rûbirûyê hejmarekî zêde ya serlêdanên penaberiyê ne û: “Ji ber vê yekê ji bo ku em wergirtina biryarên penaberiyê lez bikin, her tişta ku em niha bikin pir girîng e.”
YE’yê di sala 2015’an de jî lîsteyekî wiha pêşkêş kiribû, lê ji ber nîqaşên bê ka yek ji welatên namzet Tirkiye jî were daxil kirin an ne, dev ji vê planê berdabûn.
Komîsyonê got ku lîsteya ku roja Çarşemê hat weşandin, wê bi demê re were berfirehkirin an jî li ber çavan were derbaskirin û diyar kir ku niha welatên ku hejmarekî girîng serlêdan hatiye kirin, li ber çavan hatiye girtin.
Ji bo ku plan bikeve dewrê, divê ji aliyê Parlamentoya Ewropayê û welatên endam ve were erêkirin.
Ev rewş rexneyên komên mafên mirovan jî bi xwe re anî. Saziya EuroMed Rights di parvekirina xwe ya li ser medya dijîtal de diyar kir ku hin welatên ku di lîsteya YE’yê de cih digre pirsgirêkên “binpêkirinên mafan ên belgekirî û parastina bi sînor hem ji bo welatiyên xwe û hem jî ji bo koçberan dijî” û got ku wan welatan wekî “bi ewle” diyarkirin xeter û xapandin e.
