Bi wesîleya salvegera yekemîn a şehadetê Yekitiya Ragihandina Azad (YRA) û Yekitiya Ragihandina Jin (YRJ) şehîd Egîd, şehîdên mehên Çile û Sibatê bi daxuyaniyekê bi bîr anîn.
Daxuyanî wiha ye:
“Îroj yekemîn salvegera şehadeta hevkarê me yê rojnamevan Şervan Sîdo – Egîd Roj e ku bawer dikir peyva azad helwest e û wêneya rasteqîn jî berxwedan e, dema bi erka xwe ya veguhestina heqîqetê radibû, ji ber bomberdomana dewleta tirk a ser Bendava tişrînê, di 15 Sibata 2025`an de şehîd dibe.
Bi vê boneyê jî em di kesayeta Egîd Roj de hevkarên xwe; Îsmaîl Xelîl, Ocalan Ehmed – Tolhildan Welat, Bahoz Harûn û Ahîn Îbrahîm – Arîn Cûdî bi bîr tînin ku di dem û cihên cuda yên mehên Çile û Sibatê de, dema ku bi erkên xwe yên pîşeyî û exlaqî radibûn ku dengê gelê xwe bigihînin cihanê, şehdî bûbûn.
Ezmûn isbat dike ku armancgirtina rojnamevanan ne buyerek ji rêzê ye, lê belê rêbazek sîstematîke armanca wê jî veşartina heqîqetê, şikandina vîna civakê û bêdengkirina şahidên wê ye. Lê fedekariya hevakrên me piştrast kiriye ku çendîn hewldanên tepisandina rastiyê hebin, dê her gav kesên wê biparêzin jî hebin. Rojnamevanên azad ji bo heqîqetê, belgekirina binpêkirinan û veguhestina tabloya ragirî û berxwedanê ji raya giştî re, rolek girîng lîstine. Lew re jî, li hemberî maşîneya şer û propagandayê, bûne parçeyeke resen a têkoşîna hişmedî.
Yekîtiya Ragihandina Azad – YRA û Yekîtiya Ragihandina Jin – YRJ, bi şanazî û serbilindî şehîdên xwe bi bîr tînin û di heman demê de tekez dikin ku ala wan dê her li jor be. Armancgirtina rojnamevanan dê me ji misyona xwe ya pîşeyî û exlaqî dûr nexe. Her wiha em carek din bang li sazî û dezgehên navneteweyî yên têkildarî azadiya çapemeniyê û parastina rojnamevanan dikin ku xwedî li berpirsiyariyên xwe yên yasayî û mirovî, li hemberî sûcên li dijî rojnamevanan tên kirin, derkevin û ji bona sûcdar bên darizandin bixebitin.
Em soz didin her pênc şehîdên xwe ku em ê girêdayî pernsîbên wan bin, dengê rastiyê dê bi hêz berdewam be, em ê pabendê fedekariya wan û dilsozê rûmeta gel bin.“
