Gerîlayên HPG (Hêzên Parastina Gel) û YJA Starê (Yekîneyên Jinên Azad a Star), der barê salvegera 44’emîn a Berxwedana Mezin a Rojiya Mirinê ya 14’ê Tîrmehê de ku di dîroka siyasî ya Kurd de wekî “Roja Rûmeta Neteweyî” tê qebûlkirin, nirxandinên girîng kirin.
Gerîla Dîcle Serbilind û Rojhilat Qehreman pêşengên ku li Zindana Amedê şehîd bûn bi hurmetî bi bîr anîn û destnîşan kirin ku çanda berxwedanê ya ku ji wan dewr girtine, îro li hemû qadên têkoşînê di asta herî bilind de tê meşandin.
‘NEMIRÊN 14’Ê TÎRMEHÊ SEMBOLA HEVRÊTIYA RAST A BI RÊBER APO RE NE
Gerîlaya YJA Starê Dîcle Serbilind bal kişand ser xeta ku berxwedana zindana Amedê afirandiye û nêrînên xwe wiha anî ziman, “Di şexsê hevrê Mazlûm, Kemal, Xeyrî û Eliyan de, em hemû şehîdên 14’ê Tîrmehê bi hurmetî bi bîr tînin. Têkoşîn û berxwedana ku wan destpê kiriye, ji bo me bû bingeha xurtkirina Tevgerê. Dibe ku me bi wan re jiyan nekiribe, lê em di têkoşîna azadiyê de bi fikir, pêşengî û berxwedaniya wan vê têkoşînê dimeşînin. Em ji wan fêrî hevrêtiya rast a bi Rêber Apo û Tevgera azadiyê re bûn. Ew hevrêyên ku herî zêde Rêbertî fêm kiribûn û xwedî li ked û fikirên wî derketin.”
Dîcle Serbilind diyar kir ku Tevgera Apoyî kevneşopiya 14’ê Tîrmehê didomîne û got, “Em ê di kesayeta xwe de heqîqeta wan hevrêyan bidin jiyîn û xwedî li hevaltiya wan a sosyalîst derkevin. Di nava Tevgera Apoyî de şehîd her tim di dil û mêjiyê me de ne û tim jiyanî dibin.”
‘14’Ê TÎRMEHÊ TARÎTIYA LI SER NASNAMEYA GELÊ KURD PARÇE KIR’
Gerîlayê HPG’ê Rojhilat Qehreman jî destnîşan kir ku ew îradeya li hemberî hovîtiya li Zindana Amedê hat nîşandan ji bo gelê Kurd bûye mîladek û wiha axivî, “Ez şehîdên rûmetê yên berxwedana zindana Amedê Kemal Pîr, Mehmet Xeyrî Durmuş, Elî Çîçek û Akîf Yilmaz bi hurmetî bi bîr tînim. Berxwedana zindana Amedê ji bo me pir girîng e. Ji ber ku dijmin dixwest di wir de nasnameya gelê Kurd tine bike û îradeya şoreşgeran bişkîne. Lê şehîdên leheng bi sekna xwe ya ji pola, ji nû ve nasnameya gelê Kurd geş kirin û nîşan dan ku hebûna vî gelî heye û wê heta dawiyê jî hebe.”
Rojhilat Qehreman anî ziman ku 14’ê Tîrmehê tarîtiya li ser hebûn û nasnameya gelê Kurd rakiriye û axaftina xwe wiha bi dawî kir, “Bi saya vê berxwedanê ev Tevger gihîşt roja me ya îro û li her derê çanda berxwedanê pêş ket. Em deyndarê lehengiya wan şehîdan in. Em ê heta dawiyê xwedî li mîrateya wan derkevin û xeyalê wan ê Kurdistana azad û demokratîk pêk bînin.”
