Çalakiya ku pêşengiya Komeleya Alîkarî û Piştevaniya bi Malbatên Girtî û Hikûmxwaran a Marmarayê (MATUHAY-DER)û malbatên girtiyan ve hatiye destpêkirin, parlamentera DEM Partiyê ya Stenbolê Çîçek Otlû, nûnerên rêxistinên sivîl, partiyên siyasî û gelek welatî beşdar bûn.
Çalakiya ku li ber Girtîgeha Jinan a Bakirkoya Stenbolê li dar xistin, pankarta “Ji bo aştiya civakî tecrîdê rake deng bide azadiyê” hat vekirin.
Dayika girtî Fincê Akman di çalakiyê de axivî û bal kişand ser rewşa lawê xwe Yakûp Akman û got ku lawê wê ji ber ku di greva birçîbûnê de cih girtiye 11 rojan di hucreya yek kesî de hatiye ragirtin û qedexeya hevdîtinê lê hatiye birîn. Akman da zanîn ku şert û mercên girtiyan nebaş e û wiha axivî: “Bila hinek merhamet û wijdanê we hebe. Çima hûn li zarokên me wisa dikin? Em viya qebûl nakin.”
Parlamenter Çîçek Otlû jî axivî û bal kişand ser tecrîdkirina Abdullah Ocalan û wiha got: “Ev nêzî 4 salan e tu agahî ji rêberê gel nayê girtin. Li vî welatî di kîjan heyamê de zext hatiye kirin? Mexseda çalakiya me ew e ku agahî ji birêz Abdullah Ocalan bê girtin û azadiya wî pêk were. Desthilatdariya faşîst a AKP-MHP’ê neçare ku deriyê Îmraliyê veke û hevdîtin bên kirin. Heta ku tecrîd bê rakirin û agahî ji birêz Ocalan bê girtin wê têkoşîna me berdewam bike. Her wiha em dixwazin hemû girtiyên nexweş werin berdan.”
Piştî axaftinan çalakiya rûniştinê hat lidarxistin û dirûşm hatin berzkirin. Piştre çalakiya vê hefteyê bi dawî bû.
