Hêzên Ked, Aştî û Demokrasiyê yên Enqereyê ji bo protestokirina Şaredariya Colemêrgê li Kolana Sakaryayê çalakî li dar xist.
Di çalakiyê de pankarta “Şaredarî yên me ne, em ê destûrê nedin desteserkirinê” û “Yên bi qeyûmê werin wê bi berxwedanê here” hatin hilgirtin. Hevseroka DEM Partiyê ya Enqereyê Tatligul Gul di çalakiyê de axivî û bi bîr xist ku 80 roj bi ser desteserkirinê re derbas bûye.
Tatligul Gul got: “Em ê tu carî vê bêhiqûqî û vê tevgerîna kêfî ku vîna gel desteser dike qebûl nekin. Eger em îro li desthilatdariyê binêrin, bi rêkûpek hema hema her roj gavên li dijî gelên me; li dijî hawirdor, xweza û zindiyên me diavêje. Gelê me bi birçîbûn û xizaniyê tên îmtihan kirin. Di polîtîkayên şer û rantê de danhevekî biçûk jî nîne. Kampanyayeke dijminatiya Kurdan ku êrîşî dawet, stran û govendên Kurdan dike, ciwanên ku govendê digerînin digire, xwediyên dawetan bi rêya cendirme û polîsan dixe bin zext û çavdêriyê tê meşandin. Em careke din dubare bikin, tu tişt bi dijminatiya ziman û çanda Kurd bi dest naxin. Çavkaniya sereke ya vê bêaramiyê neçareserkirina pirsgirêka Kurd a bi heqaniyet e.”
‘DIVÊ TECRÎD BÊ RAKIRIN’
Tatligul Gul ev bang kir: “Deriyên diyalog û muzakereyê vekin, tecrîdê rakin, siyasetmedarên Kurd ên dîlgirtî, şaredarab, Demîrtaş û Kavala berdin. Wekîltiya Can Atalay lê vegerînin. Van tîştan bikin ku erdnîgariya me li lez û bez aram bibe û aştî were.”
