Rojnamevan Cîhan Bîlgîn û Nazim Daştan ku êrîşên dewleta Tirk a dagirker û çeteyên wê yên li ser Bendava Tişrînê û Pira Qereqozaxê û berxwedana li hemberî van êrîşan dişopandin, di encama êrîşeke hewayî ya dewleta Tirk a dagirker de 19’ê Kanûnê şehîd bûn. Hevrêyên rojnamevan ên Cîhan Bîlgîn û Nazim Daştan diyar kirin ku wê li hemberî êrîşên dewleta Tirk bêdeng nemînin û her ku êrîş zêde bibin ew ê jî têkoşîna xwe mezin bikin.
‘PÊŞENGÊN DEMA ZEHMET BÛN’
Berdevka Yekîtiya Ragihandina Jinê (YRJ) Arîn Siwêd: Li Bakur û Rojhilatê Sûriyeyê di dema herî zehmet de hevrê Cîhan û Nazim timî li refên pêş bûn, li eniyê têkoşiyan. Pêşengên dema zehmet bûn. Dema ku êrîşên hovane yên dewleta Tirk ji cîhanê re radigihandin, li eniyên pêş têkoşîna şervanan digihandin gelên cîhanê. Bi kamerayên xwe qala berxwedanê kirin, bi nûçeyên xwe derbasî nava rûpelên dîrokê kirin. Ji bo karibin komkujiyan, polîtîkayên qirkirinê nîşan bidin, canê xwe feda kirin. Fedakariyeke mezin kirin. Nazim û Cîhan ji bo jiyaneke bi rûmet a gel bêteredût canê xwe feda kirin. Ji vê wêdetir nîne. Ji bo hêjayî herdu hevrêyên xwe bibin em ê jî çapemeniya azad mezin bikin. Ev yek wezîfe û berpirsyariya me ya bingehîn e. Em ê ala hevrêyên xwe yên rêwiyên heqîqetê hil bidin û kamerayên wan li erdê nehêlin. Şehadeta wan wê ji bo me bibe soza tolhildanê.
‘NEDAN PEY A HÊSAN, HER TIM BERÊ XWE DAN A ZEHMET’
Rojnamevan Zinar Cafer: Li herêma me li dijî mirovahiyê sûc tê kirin. Dewleta Tirk êrîş bir ser du hevrêyên me yên rojnamevan ku êrîşên wan ên hovane dişopandin û propaganda derewîn deşîfre dikirin. Herdu hevrêyên me ji bo heqîqeta Şoreşa Rojava ragihînin kedeke mezin dan. Armanca wan a bingehîn eşkerekirina heqîqetê bû û ev yek kirin. Bi kamera û pênûsên xwe bûn dengê heqîqetê. Bi kamerayên xwe li ber êrîşên dewleta Tirk sekinîn. Kameraya wan bû dengê heqîqeta li herêmê. Di nava şert û mercên herî giran de rojnamevanî kirin. Nedan pey a hêsan, her tim berê xwe dan a zehmet. Ji ber ku rûyê rast ê dewleta Tirk raxistin pêş çavan, bûn hedef. Hevrê Cîhan û Nazim bila rehet razên, hevrêyên wan ên rojnamevan wê xwedî li keda wan derkevin û armancên wan pêk bînin. Êrîş çiqasî giran jî bin wê nikaribin çapemeniya azad bêdeng bikin.
‘DEWLETA TIRK ÇAPEMENIYA AZAD LI HEMBERÎ XWE WEKE GEFEKÊ DIBÎNE’
Endama Desteya Rêveber a Yekîtiya Ragihandina Azad (YRA) Evîn Îbrahîm: Dewleta Tirk bi dehan caran êrîş bir ser hevrêyên me yên rojnamevan. Ne pêwîste mirov dema gelekî kevn bi bîr bixin. Dewleta dagirker 23’ê Tebaxa 2023’an bombe li wesayita kedkarên çapemeniyê yên Jin TV barandibû. Di encamê de Necmedîn Faysal Hecî Sînan şehîd ketibû, Delîla Gabar bi giranî birîndar bûbû û destekî xwe winda kiribû. Yek armanceke hevrêyên me yên rojnamevan heye, ew jî ragihandina dengê gel e. Ji van êrîşan careke din hate fêhmkirin ku delweta Tirk kedkarên çapemeniya azad, rojnamevanan weke gefekê li hemberî xwe dibîne. Hevrêyên me Cîhan û Nazim şahidên cidî yên berxwedana li Bendava Tişrînê û Pira Qereqozaxê bûn û ev berxwedan radigihandin. Têkoşîna ku dihate kirin kêlî bi kêlî bêtirs dişopandin. Dewleta Tirk bi van êrîşan wê nikaribe encamê bi dest bixe. Bersiva me ya li hemberî her êrîşê wê hîn xurt be û em ê serî li ber dewleta Tirk netewînin. Li hemberî êrîşên ku dikevin ber sûcê şer divê nerazîbûneke hîn mezin bê nîşandan. Bi sedan sazî hene ku qala mafên rojnamevanan, mafên mirovan dikin. Divê li ber van sûcên şer rabin û bi berpirsyariya xwe tevbigerin.
‘BÛN DENGÊ PARADÎGMAYA NETEWEYA DEMOKRATÎK’
Nûçegihanê Ajansa Nûçeyan a Hawarê (ANHA) Rênas Remo: Êrîşa dewleta Tirk a li hemberî rojnamevanên li Bakur û Rojhilatê Sûriyeyê ne cara yekê ye. Ji roja ku DAÎŞ’ê êrîş bir ser Bakur û Rojhilatê Sûriyeyê û vir ve dewleta Tirk êrîşî hevrêyên me yên rojnamevan dike. Piştî ku hebûna fîzîkî ya DAÎŞ’ê hate bidawîkirin, dewleta Tirk polîtîkayên xwe yên êrîşa li dijî rojnamevanan dewam kir. Ji bo rastiya şoreşa li Bakur û Rojhilatê Sûriyeyê neyê ragihandin, şoreş pêk neyê rojnamevanên ku şopdarên heqîqetê ne qetil dike. Rojnamevan bûn dengê gelên Bakur û Rojhilatê Sûriyeyê. Biratiya gelan ji cîhanê re ragihandin û paradîgmaya neteweya demokratîk ji gelan re ragihandin. Dewleta Tirk dixwaze heqîqeta li herêmê negihêje gelan.”
