Hevreyên Şehîd Cîhan ên herî nêz Silava Ebd El Rehman û Xelîl Bozo ji ajansa me ANF’ê re behsa kesayet û hevaltiya Şehîd Cîhan kirin.
‘MIN DI SALA 2017’AN DE NAS KIR’
Nûçegihana Ajansa Nûçeyên Hawarê (ANHA) Silava Ebd El Rehman sersaxî ji malbata şehîd Cîhan re xwest û naskirina xwe wiha ani zıman: “Naskirina min a hevala Cîhan di sala 2017‘an çêbû. Wê demê ez nû hatibûm xebatên ragihandinê. Hevalek di karê xwe de pir cidî bû û ji karê xwe jî hez dikir. Israra Şehîd Cîhan a kar dihişt ku em jî hêz bigirin. Dema karekê wê hebûya demildest diçû cihê kar da ku kêmasî dernekeve. Her dem me jê re digot tu çima ew qas zû diçî? Ji me re digot: ‘ez bi vî rengî fêr bûme, divê kêmasî dernekevin û ez her dem dixwazim serkeftî tevbigerim.’ Sekna wê, xîtab û şêwazê wê pir rêxistinkirîbû, li her cihê ku lê bû her şopa xwe dihişt. Ez dikarim bibêjim ku Şehîd Cîhan xwedî seknekê mînak bû. Min ji bo jiyan û kar nerînên Şehîd Cîhan her tim ji xwe re esas digirt. Dema min şaşitî dikir berê min dida rastiyan. Ji ber ku ew her derdora xwe difikirî û nedihîşt ku em bikevin şaşitiyan. Her kesê ku Şehîd Cîhan nas dikir, jê hez dikir. Şehîd Cîha di dilê her kesekî/ê de cihê xwe girt. Gelek mînakên wê hene ez dikarim bêjim. Carekê em bi hev re çûbûn nav gel. Keçikek biçûk hat pêş hevala Cîhan û pere jê xwest. Hevala Cîhan bi pê re rûnişt û jê re got: ‘tu keçekê biçûkî û tu pêşeroja civaka me yî. Ji ber vê divê tu dev ji vî karî berdî û biçî pênûsa xwe rakî. Fêr bibe da ku tu hevalên xwe jî fêr bikî.’ Şehîd Cîhan wiha nêzî her kesî dibû. Şehîd Cîhan bi tu awayî şaşitî qebûl nedikir û ji bo ku bigihîje rastiya Rêber Apo xwe birêxistin dikir. Dema nûçe û dosyayên wê ji aliyê ajans û rojnameyên cuda ve dihatin weşandin pir kêfxweş dibû. Yanî kar û xebatên Şehîd Cîhan pir bi nav û deng bûn. Şehîd Cîhan di asta cîhanî de dihat nasîn. Barê herî giran a ajansê Şehîd Cîhan rakiribû.”
‘DEWLETA TIRK JI BO EŞKERE NEBE, ÇAVÊN RASTIYÊ DIKE HEDEF’
Silava Ebd El Rehman wiha dawî li axavtina xwe anî “Hevala Cîhan di nav malbatek welatparêz de mezin bûye û fakulteya hiqûqê xwendiye. Di biçûktiya xwe de rastiya dewleta Tirk nas kiriye û ziman û Kurdîtiya xwe tu carî berneda. Ew di sala 2017‘an de derbasî Rojava bû. Ji bo rastiya dewleta Tirk ragihîne dev ji xwendina hiqûqê berda û ket nav xebatên ragihandinê. Gelek xewn û xeyalên wê hebûn ku pêk bîne. Mirov çiqas li ser kesayeta wê biaxife jî nikare haqê wê bide. Tenê ez dikarim bibêjim ku jiyana wê ji bo min wek destanek bû. Îradeya me bi şehîdên me re hîn xurtir dibe û hêrsa me ya li hemberî dijmin zêdetir dike. Dewleta Tirk ji bo hovîtiya xwe veşêre, çavên rastiyê dike hedef. Dema agahî hat û gotin hevala Cîhan gihîştiyê şehadetê me bawer nekir û ji bo me pir giran bû. Lê me sekna Şehîd Cîhan anî bîra xwe û ew çawa nêz dibû me jî hewl da em jî wisa nêz bibin.”
‘ŞEHÎD CÎHAN HER DERÊ ZINDÎ KIR’
Nûçegihanê Ajansa Nûçeyan a Hawarê Xelîl Bozo jî got, “Dewleta Tirk a dagirker li seranserê Bakur-Rojhilatê Sûriyeyê êrîşan dike. Bi taybet dema dawî li bendava Tişrîn û pira Qaraqozaxê şerekî dijwar pêk hat û heta niha jî berdewam e. Şehîd Cîhan bi cesareta xwe xwest ku here û rastiya dewleta Tirk ji raya girştî re ragihîne. Ev yek ji dijmin re nexweş hat û Şehîd Cîhan hedef kir. Ji bo çewisandina dengê rastiyê dewleta Tirk nûçegihanan dike hedef. Rastî jî şehadeta Şehîd Nazim û Şehid Cîhan ji bo me êşek gıran bû. Em ê heta dawî jî pênûsa her dû hevalan li erdê nahêlin. Şehîd Cîhan di nav me de wek ruhek bû. Ew di asta cîhanî de dihat nas kirin û li her cihê ku derbas dibû şop li pey xwe dihişt. Her dem bi hezkirin nêzî derdor û hevalan dibû. Tu carî nedixwest hevalên xwe bişkêne yan jî dilê hevalên xwe bihêle. Lê şaşitî qet qebûl nedikir. Dema şaştiyek didît rêflêksên wê derdiketin. Her wiha Şehîd Cîhan bi şêwazên rast şaştiyan çareser dikir. Cihê Şehîd Cîhan di dilê me de taybet bû. Me bi hev re bîranînên pir xweş jiyan kir. Tiştên ku Şehîd Jiyan dixwest ji raya giştî re ragihîne em ê berdewam bikin. Ew hevalek pir dilgêş bû, rihê wê her tim zindî bû û her derê zindî dikir. Her kes jê hez dikir. Liv û tevgera wê di civakê de giraniyek çêkiribû. Her dem Şehîd Cîhan serdana malbatan dikir. Dema ji malan derdiket ruhek zindî li wir dihişt. Di heman demê de kar û xebatên wê jî wisa bûn. Şehîd Cîhan di dilê me de ye û em ê bîranîna Şehîd Cîhan bıdın jiyandin û pênûsa wê li erdê nehêlin.”
