Konseya Bajêr a Şaredariya Bajarê Mezin a Wanê li otelêkê civîna xwe ya 2’yemîn a Desteya Giştî ya Asayî pêk anî.
Rêxistinên civakî, partî û muxtar jî di nav de 500 kes beşdarî civinê bûn.
Di civînê de li hemberî cezayê ku li Hevşaredarê Bajarê Mezin ê Wanê hatî birîn, nerazîbûn hate nîşandan û axaftina despêkê ji aliyê Hevseroka Konseya Bajêr Sevînç Ozdînçê ve hate kirin. Ozdînçê ev yek anîn ziman: ‘’Li tu deverên cîhanê ji bo parastina şaredariyê nobed nayê girtin lê belê ji ber kiryarên antîdemokratîk mixabin ku gelê Kurd vê yekê dikin. Divê em hemû li dijî desteserkirina şaredariyan bisekinin û nerazîbûnên xwe nîşan bidin.’’
Hevserokê Rêxistina Bajêr a DEM Partiyê Veysî Dîlekçî jî bal kişand ser berxwedana gel a li hemberî derbeya qeyûm û got: ‘’Li vî bajarî pêvajoyeke derasayî heye.’’
Dîlekçî piştre destnîşan kir ku bi van kiryaran mafên demokratîk tên binpêkirin û ev yek anîn ziman: ‘’Mijara me bes ne desteserkirina şaredariyan e, mijara tunehesibandina îradeya gelê Kurd li pêşiya me ye. Mijar mijara îpotekkirina pêşeroja gelê Kurd, nasnekirina nasname û gelê Kurd e. Desteserkirina şaredariyên li Kurdistanê tê vê wateyê.’’
Dîlekçî di dawiya axaftina xwe de diyar kir ku ew ê li hemberî van kiryarên derqanî li ber xwe bidin û got: ‘’Ji bo ku li vî welatî demokrasî were dabînkirin, em ê li ber xwe bidin. Ez bang li her kesî dikim ku beşdarî berxwedana li pêşiya bînaya şaredariyê bibin.’’
Hevseroka Rêxistina Bajêr a DBP’ê Gonul Ûzûnay jî axivî û got: ‘’Divê em li hemberî vê faşîzmê li ber xwe bidin(…) Mafê hilbijartinê, mafê vî gelî yê herî hiqûqî û mirovî ye. Gelê me dê mafê xwe biparêze.’’
Hevşaredara Bajarê Mezin a Wanê Neslîhan Şedal jî wiha axivî: ‘’Îro li Wanê berxwedaneke mezin heye. Gelê me berxwedaneke mezin nîşan dide. Divê hemû gelê me, rêxistinên civakî, ciwan û jin li hemberî desteserkirina îradeyê bisekinin û em ê ji bo dabînkirina aşitiya civakî li ber xwe bidin.’’
Herî dawiyê jî Hevşaredarê Bajarê Mezin ê Wanê Abdullah Zeydan axivî û ev yek anîn ziman: ‘’Di encama hevdîtinên li gel Birêz Ocalan de peyamên gelekî girîng hatin dayîn lê belê li vir îradeya gel tê desteserkirin. Divê serdemê de ku em gelekî nêzîkî aşitiya civakî ne, çima di desteserkirina şaredariyan de israr dikin? Em bi serbilindî li îradeya xwe xwedî derdikevin ku ev yek tê wateya xwedîderketina pêvajoya aşitiyê jî. Me hemûyan berpirsiyariyên dîrokî hene. Divê em rê nedin kesên ku hewl didin îradeya vî gelî desteser bikin. Em weke gelê Wanê em ê tu carî rê nedin vê yekê û em ê rûmeta xwe biparêzin.’’
Piştî axaftinan beşdarvanên kongreyê axivîn û banga berxwedanê kirin.
