Berî niha bi salekê 11 Sibata 2024’an dewleta Tirk a dagirker li hember Federasyona Gaziyên Bakur û Rojhilatê Sûriyeyê bi balafira bêmirov a biçek êrîşeke nemerd pêk anî. Di wê êrîşê de ji rêveberên federasyona gaziyan Sorxwîn Rojhilat û Azadî Dêrik şehîd bûn.
Sorxwîn a li Botanê têkoşîneke bi rûmet dimeşand, dema çeteyên DAÎŞ’ê êrîşî Kobanê kirin, bêteredut bi komeke hevalên xwe re derbasî Rojava bûn û tevlî berxwedana li dijî çeteyan bûn. Di wê berxwedana bi rûmet de yek ji şervanên azadiyê Zarîn Kobanê jî hebû. Zarîn, li Kobanê bi hevala xwe Sorxwîn re li dijî çeteyên dijminê mirovatiyê şer kirin. Zarîn di heman demê de şehîd Azadî Dêrik jî ji nêz ve nas dikir.
Zarîn Kobanê ya di berxwedana Kobanê de bû gazî, derbarê hevrêyên xwe şehîd Sorxwîn û şehîd Azadî axivî.
‘HEVAL SORXWÎN PÊŞENGA ME BÛ’
Gaziya şer Zarîn Kobanê diyar kir ku li Kobanê bi fermandar Sorxwîn re di nav berxwedanê de cih girtibûn û got, “Hevrê û fermandara min Sorxwîn li şûna xwe gelek êş û xembarî hiştin. Bi rastî şehadeta qehreman Sorxwîn hêrsa min a li hemberî dijminê hov û dirinde çend qat zêde kir. Hestên tolhildanê li cem min xurttir kir.”
Zarîn destnîşan kir ku fermandar Sorxwîn di nav jiyanê de li hember pirsgirêkan timî rêbazên avaker pêş dixist û wiha dewam kir, “Heval Sorxwîn Rojhilat ji bo me heval, xwişk, dayik û pêşeng bû. Heval Sorxwîn piştî bû gazî jî qet dest ji rêbazên xwe yên avaker berneda. Çend sal bûn ku ez û hevala şehîd Sorxwîn, her bi hev re bûn. Piştî şerê bajarê Kobanê, me hevdu li federasyona gaziyan dît. Heval Sorxwîn fermandar û hevrêya min bû.”
‘EM Ê HÊVIYÊN ŞEHÎDAN PÊK BÎNIN’
Gaziya şer Zarîn derbarê şehîd Azadî Dêrik jî anî ziman ku pir ji Azadî hez dikir û bi heman rengî Azadî jî jê hez dikir û piştî kesereke kûr ev xisûs anî ziman, “Ya rastî heval Azadî ji tevahî hevalên gazî hez dikir û ew diparastin. Ez pir zehmetiyê dikişînim û nizanim bê çawa fermandara xwe Azadî wesf bikim û bînim ser ziman. Vaye gelê Kobanê yê berxwedêr li bendava Tişrînê bi rûmet li ber xwe didin. Li keda şehîd Sorxwîn û tevahî şehîdên xwedî derdikevin. Dixwazin bibin layiqî şehîdan”
Zarîn di dawiya axaftina xwe de êrîşên dewleta Tirk û çeteyên wê bi tundî şermezar kir û di şexsê şehîd Sorxwîn û şehîd Azadî de hemû şehîdên azadiyê bi bîr anî û got, “Em ê ti carî dest ji têkoşîna xwe bernedin. Soza serketina welatekî azad a me daye şehîdan teqez em ê bînin cih. Em ê armanc û hêviyên şehîdên xwe pêk bînin.”
