Parlamentera DEM Partiyê Sumeyye Boz anî ziman ku bi banga Rêber Apo re wê rê û rêbazên têkoşînê biguherin û destnîşan kir ku di avakirina civaka demokratîk de wê jin bi rola pêşengiyê rabin.
Parlamentera DEM Partiyê Sumeyye Boz ji ANF’ê re axivî û diyar kir ku ev pêvajo divê êdî derbasî ser rêya siyaseta demokratîk bibe, di asta navneteweyî de jî xetên têkoşînê û rêbaz ji nû ve bêne dîzaynkirin. Sumeyye Boz destnîşan kir ku divê civaka demokratîk bê avakirin û got, bingeha vî karî jî li Meclîsê bi beşdariya hemû partiyan divê bê kirin.
TÊKOŞÎN DIGUHERE
Sumeyye Boz bi bîr xist ku Rêber Apo bi dehan sal in di lêgerîna zemîna hiqûqî û aştiyê de ye û got, “Ev bang bangeke nû nîne, lê belê çarçoveya wê hîn şênber bûye. Bi manîfestoyekê hatiye destnîşankirin. Aqlê dewletê yên înkarê bi rêya têkoşînê gihîştiye nuqteyekê û rê û rêbazên têkoşînê wê ji niha û pê ve bêne guhertin. Têkoşîn ji qedandinê wêdetir diguhere.”
HIŞMENDIYA BERPIRSYARIYÊ XURT BÛ
Sumeyye Boz anî ziman ku her kesî demokratîkbûna civakê weke pêwîstiyê dîtiye û destnîşan kir ku hişmendiyeke welê afirî ye ku di rêya aştiyê de divê her kes bi berpirsyariyê rabe, muxalefet jî di vê mijarê de qanih bûye. Sumeyye Boz diyar kir ku bi gava destpêkê re muxalefet xwedî li bangê derketiye, berpirsyariya xwe bi cih aniye û destnîşan kir ku ji niha û pê ve divê desthilatdarî gaveke şênber û cidî biavêje. Sumeyye Boz got, “Birêz Erdogan daxuyanî da û anî ziman ku derbasî qonaxeke nû bûne. Lê belê bûyerên ku li qadê diqewimin berevajî van gotinan e. Desthilatdarî divê ji bo aştiyê gavên bi wêrekî biavêje.”
JIN DIKARIN AŞTIYÊ CIVAKÎ BIKIN
Sumeyye Boz 8’ê Adarê bi bîr xist û ragihand ku jin di avakirina aştiyê de bi rola pêşengiyê radibin û got, “Kesayetên azad dikarin civakên azad biafirînin û jin ên azad weke pêşengên vê civakê dikarin civakîbûnê hîn xurt bikin.” Sumeyye Boz destnîşann kir ku têkoşîna azadiya jinê yek ji dînamîkên eslî yên civakê ye.
JIN WÊ AŞTIYÊ BIPARÊZIN
Sumeyye Boz destnîşan kir ku îsal di nava rewşeke dîrokî de 8’ê Adarê pêşwazî dikin, jin ji her demê bêhtir li refên pêş ên têkoşînê ne û di avakirina aştiyê de jin wê bi rola xwe rabin. Sumeyye Boz diyar kir ku wê bi dirûşma ‘Jin, Jiyan, Azadî’ li qadan bin û got, “Bang li jinan hemûyan dikim ku xwedî li felsefeya ‘Jin, Jiyan, Azadî’ derkevin, bibin dengê aştiyê û qadên 8’ê Adarê bikin qadên têkoşîna jinê, kedê û parastina aştiyê.”
