Şervanên Yekîneyên Parastina Jinê (YPJ) 8’ê Adarê ya îsal jî bi berxwedanê pêşwazî dikin. Şervanên YPJ’ê ku li hemberî êrîşên dagirkeriyê yên dewleta Tirk û çeteyên wê yên li ser Bendava Tişrînê li ber xwe didin, wê 8’ê Adarê Roja Jinên Kedkar ên Cîhanê li çeperên berxwedanê pîroz bikin.
Şervanên YPJ’ê Avaşîn Basya û Sorxwîn Cûdî gotin, li dijî mejiyê serweriya mêr wê parastina xwe hîn xurt bikin û ji bo gelan bi taybetî jî ji bo jinan wê di 8’ê Adarê de têkoşîna xwe mezin bikin.
‘EM Ê RÊ NEDIN XEWN Û XEYALÊN DAGIRKERIYÊ’
Avaşîn Basya diyar kir ku li Bendava Tişrînê dîrok hatiye nivîsandin û got, “Ji 8’ê Kanûnê û vir ve em li ber xwe didin. Şervanên YPG-YPJ’ê her tim li ber xwe dan û jiyana xwe bi berxwedanê derbas kirin. Îro jî berxwedana li Tişrînê dîrokê dinivîsîne. Şervan li hemberî teknîka serdemê bi îradeya xwe şer dikin. Teknîka dewleta Tirk û çeteyên wê nekarî îradeya şervanan bişikîne. Berevajî vê yekê îradeya me xurt kir û berxwedana me her roj hîn mezin dibe. Berxwedana me di çarçoveya hilanîna tola hevrêyên me yên şehîd de wê mezin bibe. Dewleta Tirk û çeteyên wê bila nêt neke ku karibe Tişrînê dagir bike.”
‘EM Ê BI BERXWEDANA XWE GELAN BI SER BIXÎNIN’
Avaşîn Basya bal kişand ser berxwedana gel a nobeda li Bendava Tişrînê û bi dewamî got, “Li gel şervanan gelên me jî tevlî refên berxwedanê bû. Şervan li çeperên pêş li ber xwe dide, gel jî li bendavê kete nobedê û got, ‘Em ê rê nedin dagirkeriyê’. Li Bendava Tişrînê Şerê Gel ê Şoreşgerî tê meşandin. Dayikên me, bavên me, xwişk û birayên me ji bo parastina ax, av û enerjiya xwe canê xwe feda dikin, li ber xwe didin. Berxwedan, kelecan û moralê gelê me hêzê dide me. Di berxwedana gel de ku bi felsefeya Rêber Apo mezin bû, gel û şervan dilsozê hev in. Em bêyî gel, gel jî bêyî me nabe. Em ê berxwedana xwe bi hev re bi ser bixînin.”
HÊVIYA PÎROZKIRINA 8’Ê ADARÊ BI RÊBER APO RE
Avaşîn Basya destnîşan kir ku bi wesîleya 8’ê Adarê wê berxwedana Bendava Tişrînê bigihînin asta herî bilind û got, “8’ê Adarê li Rêber Apo û jinên berxwedêr pîroz be. 8’ê Adarê ji bo me ne tenê rojek e, ji bo her roj 8’ê Adarê ye. He rojeke salê ji bo me 8’ê Adarê ye. Her roj bi coşa 8’ê Adarê derbas dibe û berxwedan tê kirin. Hêviya me ew e ku vê 8’ê Adarê bi Rêber Apo re pîroz bikin. Mezinbûna berxwedana jinê, kûrbûna têkoşîna jinan bi saya Rêber Apo ye. Ne ji paradîgmaya azadiya jinê ya Rêber Apo bûya em nedigihîşt vê astê, me xwe nas nedikir. Herî dawî roja jinan li jinan hemûyan pîroz dikim. Silav ji jinên berxwedêr re.”
JI BERXWEDANA TIŞRÎNÊ SILAVÊN JI JINÊN CÎHANÊ RE
Sorxwîn Cûdî ku du meh in di nava berxwedana Bendava Tişrînê de ye got, “Li Tişrînê berxwedaneke awarte hate kirin. Bi Şerê Gel ê Şoreşgerî bersiv ji êrîşên giran re hate dayin. Bi armanca pêkanîna parastina xwe, em êrîşên çeteyan dişikînin. Bendava Tişrînê ya me ye, em ê dest ji bendava xwe bernedin.”
Sorxwîn Cûdî ku 8’ê Adarê li Bendava Tişrînê pêşwazî dike, got “Jin pêşengiyê ji berxwedanê re jî dikin. Jin jiyanê ji nû ve ava dikin. Em ê 8’ê Adarê li Tişrînê bi berxwedanê pîroz bikin” û ji çeperên berxwedanê 8’ê Adarê li jinan hemûyan pîroz kir.
