Bi pêşengiya Tevgera Jinên Azad (TJA) bi wesîleya 8’ê Adarê Roja Jinên Kedkar ên Cîhanê bi şîara ‘Em li dijî qirkirina jinê serî hildidin û ber bi azadiyê ve dimeşin’ mîtîng tê lidarxistin. Hevseroka Giştî ya Partiya Wekhevî û Demokrasiyê ya Gelan (DEM Partî) Tulay Hatîmogûllari û endama Şandeya Îmraliyê Pervîn Buldan jî beşdarî mîtîngê dibin.
Ji saetên siharê ve jin bi rê ketin û ketin du nuqteyên lêgerînê yên li qadê. Jin bi cil û bergên xwe yên neteweyî beşdarî mîtîngê bûn. Bê navber dirûşmeyên “Bijî Serok Apo” û “Jin jiyan azadî” tên berzkirin. Komeke jinan li ber avahiya Rêxistina DEM Partiyê ya Bajêr hatin ba hev û bi rengê kortejê ketin qada mîtîngê. Jinan pankartên “Tu bandor dikî, diguherînî û tu wê mezintir dikî”, “Li hemberî Qirqirina jinê em ê serî rakin, em ê azadiyê ava bikin”, “Aştî mafê gelê Kurd e, statuyeke mayînde mafê gelê Kurd e, wekhevî mafê gelê Kurd e” hilgirtin.
Piştî deqeyek rêzgirtinê Hevseroka DEM Partiyê ya Bajêr Gulşen Kurt axivî û got, “Banga Rêberê Gelê Kurd Abdullah Ocalan Apo ji bo me hemûyan e. Em li dijî polîtîkayên qirêj, têkoşîneke mezin dimeşînin. Heta jin azad nebe, civak azad nabe.”
Hevseroka DBP’ê ya Bajêr Gonul Uzunay peyama Rêber Apo ya ji bo jinan bi Kurdî, Aynur Sarica jî bi Tirkî xwend. Jinên li qadê piştî xwendina peyamê, bi yek dengî dirûşmeya “Bijî Serok Apo” berz kirin.
Hevşaredara Bajarê Mezin a Wanê Neslîhan Şedal ku wezîfeya wê hate xespkirin û qeyim li şûna wê hate tayînkirin, wiha got: “Jinên li Wanê, bi rojan li dijî xespa îradeyê li kolanan li ber xwe dan. Jin wê vê îradeyê biparêzin. Niha pêvajoyek nû destpê dike. Em piştgiriyê didin vê pêvajoya ku bi pêşengiya Birêz Abdullah Ocalan destpê kir û soz didin ku em ê xwe rêxistin bikin û aştiyê bînin.”
Aktîvîsta TJA’yê Zekiye Îlbasan jî ev tişt bilêv kir: “Rêberê Gelê Kurd Abdullah Ocalan banga ‘Aştî û Civaka Demokratîk’ kir. Jiyaneke bi rûmet, encex bi azadiya jinan pêkan e. Ji bo vê yekê divê em kolan bi kolan, mal bi mal xwe rêxistin bikin. Em ê têbikoşin heta ku hesabê hemû jinên hatine qetilkirin, tê pirsîn. Em ê li dijî qirkirina jinê bi ser bikevin û azadiya Rêbertiya xwe pêk bînin.”
Piştî axaftinan Koma Vejîn derket ser dikê.
