Dîwana Hevserokatiyê ya KONGRA-GEL têkildarî koça dawî ya siyasetmedarê Kurd Hacî Ehmedî peyama sersaxiyê weşand.
KONGRA GEL sersaxî ji malbata Hacî Ehmedî, ji PJAK’ê, KNK’ê û gelê Kurdistanê re xwest.
Di peyamê de hate gotin, “Em wek KONGRA- GEL û hemû dostên wî yên dilsoz, ji ber koça dawî ya Heval Hacî Ehmedî pir xemgînin. Wefata Heval Hecî Ehmedî ji bo gelê Kurdistanê windayiyeke pir mezin e.”
Di daxuyaniyê de qala têkoşîna Hacî Ehmedî ya ji bo azadiya Kurd û Kurdistanê hate kirin û hate gotin, “Heval Hacî Ehmedî ji ciwaniya xwe heta dawiya emrê xwe hemû jiyana xwe ji bo azadiya gelê Kurdistanê pêşkêş kir. Di drestpêka salên 1960’an de ji bo perwerdeya zanko hatiye li Ewropayê. Û ji wê demê heta roja dawî meşa xwe ya azadiyê bê navber dewam kiriye.
Wek ciwanekî endamê Yekîtiya Xwendekarên Kurd li Ewropayê, xebatên welatparêziyê meşandiye. Li gel Dr Abdurehman Qasimlo di rêveberiya HDK-Î de cîh girtiye.
Dema ku li Bakurê Kurdistanê têkoşîna azadiyê bilind dibe, di jiyan û xebatên Heval Hacî Ehmedî de jî demeke nû destpê dike. Di sala 1995’an de di damezrandina Parlamenta Kurdistanê Derveyî Welat (PKDW) de, di sala 1999’an de di damezrandina Kongreya Neteweyî ya Kurdistanê (KNK) de û di sala 2004’an de di damezrandina Partiya Jiyana Azad a Kurdistanê (PJAK) de wek endamekî damezrêner cih digre û ji bo azadiya gêlê Kurdistanê di van pêngavên dîrokî de roleke sereke dileyîze.
Heval Hacî Ehmedî di kongra yekemin ya PJAK’ê de wek Serokê Giştî hate hilbijartin. Ji bo çareseriya pirsgirêka gelê Kurd, ji bo azadiya gelê Rojhilatê Kurdistanê, bi heyecan û dilsozî kar kir.
Di hemû jiyana xwe de tenê ji bo azadiya gelê Kurdistanê xebitî. Mirovekî pir dilnizm û dilsozê gelê xwe bû. Hedef û daxwaziyeke wî ya şexsî hîç çênebû. Ji ber vê yekê jî di dile gelê çar perçeyên Kurdistanê de cîh girt û pir hate hezkirinê.
Em wek Tekoşîna Azadiyê û hemû hevalên Kak Hacî Ehmedî soz didin ku, em ê di tekoşîna xwe de wiya bidin jiyankirin, armanç û xeyalên wiya pêk bînin. Li ser wî esasî em car din ji bo malbatê, ji bo PJAK’ê, ji bo hemû dost û hevalên wî û ji bo gelê Kurdistanê sersaxî dixwazin, êşa wana parvedikin.”
