Konseya Rêveber a Kongreya Neteweyî ya Kurdistanê (KNK) bi daxuyaniyeke nivîskî cejna Newrozê li her kesê pîroz kir.
Daxuyaniya Konseya Rêveber a KNK’ê bi vî rengî ye:
“Cejna Berxwedanê, Cejna Azadiyê, Newroz Pîroz be!
Di dîroka Kurdistanê de, herdem Newroz xwedî cihekî diyar e. Newroz roja berxedanê ye, Newroz serhildan e, Newroz roja serketina li hember zilmê ye, Newroz cezna azadiyê ye. Newroz li ser bingehê têkoşîna dijî bindestiyê derketiye holê. Li dijî zilmê, koletiyê, dagirkeriyê û her reng bindestiyê bûye sembola rizgarî û azadiyê.
Îro gelê Kurd, bi ked û berxedana xwe ya salan û bi bedelên mezin, Newroz kiriye şahiyeke mezin a gelêrî û roja berxwedanê. Her wiha bi vê keda xwe di qada navneteweyî de jî, Newroz weke cejna Kurdan daye naskirin. Gelê Kurd, Newrozê li seranserê Kurdistanê û li derveyî welat her wekî naveroka wê ya dîrokî, bi armanca rizgarî û azadiyê pîroz dikin. Kurdan, Newroz di têkoşîna xwe ya her alî de, li gundan, li bajaran, li zîndanan, li her cih û warê jiyanê Newroz kirine çeperê têkoşîna rizgarî û azadiyê.
Li seranserê Kurdistanê agirê Newrozê îro gurtir e. Li başûr û rojavayê Kurdistanê bi rengekî fermî tê pîrozkirin. Li rojhilat û bakurê Kurdistanê jî li gel hemû astengiyên dagirkeran, disa jî bi wateya xwe tê pîrozkirin û agirê rizgarî û azadiyê gurtir tê hilkirin.
Bi Newrozê ve em dest bi salekî nû dikin. Sala derbazbûyî di hemû waran de bû salekî tekoşînê. Di nava vê salê de dijminên me gelek aktîfbûn û li gelek deveran bi hêzên mezin êrîş kirin. Bi taybetî dewleta Tirk êrîşên xwe yên li ser Başûr û Rojava zêde kirin. Dewleta Tirk dijminê sereke yê gelê Kurd e. Planên wan planên têkbirinê ne û eger bikarin li kû devera cîhanê be bila bibe, wê hemû deskeftiyên Kurdan têk bibin. Li hember êrîşên dewleta Tirk, ji teref Tevgera Azadiyê ve li seranserê Kurdistanê berxwedanek mezin hate meşandin. Dewleta Îranê jî di vî warî de şîrikê dewleta Tirk e. Dewleta Îranê di nava vê salê de bi desteka hikûmeta Bexda êrîş û zextên mezin anîn ser hêzên Kurdî.
Li rojavayê Kurdistanê jî, dagirkerî û êrîşên dewleta Tirk berdewam in û hingî diçe gefên dewleta Tirk zêde dibin. Dixwazin deskeftiyên gelê me yên li Rojava têk bibin. Di dawiya sala derbaz bûyî de rejîma Baas têk çû û hêzeke Îslamiya tundrew ku navê wê HTŞ e hate ser hukum. Rewşa Suriyê bi giştî ne diyar e ku wê dema pêş de çi bibe. 10’ê Adarê di navbera Rêveberiya Xweser a Bakur û Rojhilatê Sûriyê û Rêveberiya Şamê de peymanek hate çêkirin. Ew peyman gelek giring e, cara yekeme li Sûriyê, di asta serokatiyê de, di belgeyên fermî de, li ser bingeha destûrî, heyîn û mafê gelê Kurd tê qebûlkirin. Divê em hemû hewl bidin ku ev peyman bê cîbecîkirin.
Ev ji salek û nîvê zêdetire li herêma Rojhila Navîn şerekî mezin heye. Şer li Xezeyê despê kir û lê firehbû. Derbazî Lubnan, Suriyê, Yemenê, Iraq û Îranê bû. Ev şer hingî diçe mezintir dibe û Kurdistanê jî hildide nav xwe. Dewletên dagirkerên Kurdistanê her yek dibin terefê vî şerî. Ev rewş ji bo me hem xeterî hem jî derfetan bi xwe re tîne.
Ev rewş erk û wezîfeyên me jî diyar dike. Divê li hember hemû dagirkeran tedbîr bêne girtin, divê hêzên parastinê bêne xurtkirin, divê êrîşên dijminan bêne şikanandin, divê deskeftiyên heyî bêne parastin û deskevtiyên nû bêne bidestxistin. Divê li Bakur û Rojava hewldanên aştî û diyalogê bêne destekkirin. Divê hevkariya bi dijminan re weke xeta sor bê dîtin û bê mehkumkirin. Ji bo van hemûyan divê di serî de yekrêziya nav mala Kurdî bê avakirin û yekîtiya neteweyî bê xurtkirin. Divê em îsal bikin sala azadiyê.
Em Newrozê di vê rewşê de pêşwazî dikin. Em ê Newrozê weke wateya wê, bi ruhê berxwedanê pîroz bikin. Em bang li gelê xwe dikin û dibêjin; weke salan dakevin qadan û Newrozê bi ruhê berxedanê pêşwazî û pîroz bikin.
Di vê qonaxa giring a pêvajoya têkoşîna rizgarî û azadiya Kurdistanê de, agirê Newrozê divê bibe ronahiyeke geş a tifaq û yêkîtiya gel û neteweyê Kurdistanê.
KNK bi vê bîr û baweriyê Newroza hemû Kurd û Kurdistaniyan bi dilgermiya neteweyî û niştimanî pîroz dike.
Dem dema xurtkirina berxwedanê ye.
Dem dema serketin û azadiyê ye.
Newroz pîroz be!”
