Meha Gulanê ji aliyê gelê Kurd û Tevgera Azadiyê ve xwedî wateyeke cuda û pir mezin e. Ji şehadeta şoreşgerê mezin Hakî Karer heya îro gelê Kurd û Tevgera Azadiyê ji bo doza azadiyê gelek fedayî û leheng şehîd dan. Her wiha gelek leheng jî di meha Gulanê de gihiştin nemiriyê. Lewma meha Gulanê her ku çû ji bo Tevgera Azadiyê û gelê Kurd bû xwedî wateyeke taybet û êdî weke meha lehengan û şehîdan tê pênasekirin.
Gerîlaya YJA Starê Kajîn Efrîn û gerîlayê HPG’ê Dilsoz Avzem têkildarî girîngiya Meha Şehîdan axivîn.
Gerîla Kajîn Efrîn di destpêka axaftina xwe de şoreşgerê mezin Hakî Karer bi bîr anî û got, “Meha Gulanê, meha biharê ye ku bi rengên xwezayê xwe xemilandiye. Lê belê ya ku meha Gulanê hîn bi watetir dike, şehîdên me ne. 18’ê Gulanê roja şehadeta hevrêyê Rêber Apo heval Hakî Karer e. Rêber Apo tola şehadeta heval Hakî tenê bi çalakiyan na, bi damezrandina PKK’ê jî hilda. Gelek ciwanên Kurd û enternasyonalîst li pey şopa hevrê Hakî çûn, pêşengî kirin û bi berxwedanên mezin lehengî raber kirin û gihiştin şehadetê. Ev hevrêyên me li ser rêya heqîqetê meşiyan û gihiştin armancên xwe.
Di vê meha pîroz de em hunermenda pêşeng û şoreşger Hozan Mizgîn jî bi rêzdarî bi bîr tînin. Heval Mizgîn bi deng û stranên xwe ji her kesê re jiyan, lehengî û fedakariya gerîla vedigot. Em ji zarokatiya xwe ve guhdarî Hozan Mizgîn dikin. Hozan Mizgîn hem şoreşgerek bû, hem jî bi dengê xwe yê xweş rastiyên gel û dîrokê vedigot. Bi saya şoreşgerên wiha ev meh bû meha şehîdan. Weke gerîlayên Kurdistanê em ê li pey şopa hemû hevrêyên xwe yên şehîd bimeşin. Heta ku azadiya fîzîkî ya Rêber Apo pêk tê, em ê têkoşîna xwe bidomînin.”
‘ŞEHÎDÊN ME JI ME RE MÎRATEYEKE PIR BI NIRX HIŞT’
Gerîlayê HPG’ê Dilsoz Avzem jî derbarê meha şehîdan Gulanê ev tişt got, “Mîna heval Hakî gelek hevrêyên me di vê mehê de şehîd bûn. Şehadeta heval Hakî bû wesîleya damezrandina PKK’ê, ji ber ku Rêber Apo ji bo bîranîna wî partî ava kir. Di têkoşîna me ya 50 salî de gelek şehîdên me yên hêja çêbûn. Têkoşîna me nîv sedsal tejî kir. Îro jî bi pêşengiya Rêber Apo pêvajoya Aştî û Civaka Demokratîk hatiye destpêkirin. Mîmarê vê demê jî Rêber Apo ye. Ev pêvajo jî bi temamî berhemê keda Rêber Apo û şehîdên me ye.
Weke gerîlayên azadiyê em ê jî xwedî li keda Rêber Apo û şehîdan derbikevin. Şehîdên me ji me re mîrateyeke mezin û pir bi nirx hişt. Divê em li çar parçeyên Kurdistanê bi yek deng û yek ruhî xwedî li şehîdên xwe derbikevin. Bi wesîleya meha şehîdan û salvegera şehadeta hevrê Hakî Karer, em car din hemû şehîdên azadiyê bi bîr tînin û li ber bîranînên wan bi rêzdarî bejna xwe ditewînin.”
