Heyeta Îmraliyê ya Partiya Wekhevî û Demokrasiyê ya Gelan (DEM Partî) piştî 13 salan li Beştepeyê bi Serokkomar Erdogan re hevdîtinek pêk anî. Erdogan, Serokê MÎT’ê Îbrahîm Kalin û Alîkarê Serokê Giştî yê AKP’ê Efkan Ala jî beşdarî hevdîtinê bûn. Hevdîtina dîrokî ya ku ji Heyeta Îmraliyê Pervîn Bûldan û Sirri Sureyya Onder pêk dihat, nêzî 1 saet û 25 deqîqeyan dewam kir.
Pervîn Bûldan beşdarî televîzyona Medya Haberê bû û da xuyakirin ku piştî hevdîtinê wê pêvajo leztir bibe û dê hevdîtinên xwe yên bi partiyên siyasî re berdewam bikin. Pervîn Bûldan, da zanîn ku ji bo hevdîtina 10’ê Nîsanê ragihînin ew ê biçin Îmraliyê.
Pervîn Bûldan, her wiha anî ziman ku ji bo ev pêvajo veguhere zemîneke hiqûqî ew ê hefteya bê daxwaza hevdîtinê li gel Wezareta Edaletê bikin. Pervîn Bûldan got, “Ji bo rêveçûna pêvajoyê, bi taybetî jî mafê hêviyê, gavên qanûnî divê bên avêtin. Bi ya min dê di demên pêş de di van mijaran da gav werin avêtin. Heta ku meclîs berpirsyarî negire pêvajo wê bi pirsgirêk be. Em ê di hefteya pêş de bi Wezareta Edaletê re der barê gavên hiqûqî de hevdîtinê pêk bînin. Di hevdîtinê de li ser guhertina kijan qanûnê û pêdivî bi kîjan qanûnan heye dê nîqaş bên kirin. Li ser gavên ku bên avêtin, wê nêrîn bên parvekirin. Ji bo ev qanûn bên qebûlkirin wê hevdîtin berdewam bikin.”
