Bi hezaran kes ji şêniyên bajarê Qamişlo, Tirbespiyê, Amûdê û Til Hemîs bi pêşengtiya Însiyatîfa Gel a Bajarê Qamişlo ji bo azadiya Rêber Apo ya fizîkî li bajarê Qamişlo meşeke girseyî lidar xist.
Welatî, di nava wan de xwendekar, ciwan û jin. Nûnerên ji Rêveberiya Xweser bi pêkhateyên Kurd, Ereb, Suryan, Ermen û Êzdî bi deng û alên xwe tevlî meşê bûn.
Meş ji çerxerêya Osman Sebrî bi berzkirina sloganên “Bi can bi xwîn em te re ne Ocalan”, “Bê serok jiyan nabe”, “Bijî Berxwedana Îmralî” û “Bijî Berxwedana Zindanan”, rakirina wêneyên Rêber Apo Ocalan destpê kir.
Di nava meşevanan de zarok û xwendekaran wêneyên Rêber Apo li ser milên xwe danîbûn û nîşaneyên serketinê rakiribûn.
Piştî ku meşevan gihîştin ber çerxerêya Şehîd Rûbar li wir deqeyeke rêzgirtin rawestiyan û paşê Endamê Însiyatîfa Gel a Kantona Cizîrê Kenan Berekat axivî û destnîşan kir ku Rêber Abdullah Ocalan rêberê gelê Ereb, Suryan, Ermen, Kurd, Xiristiyan, Misilman û Êzdiyan e. Hêzên komploger bi komployê xwestin vîna gel bişkînin û wan nizanîbû li her maleke welatparêz Rêber Apo heye. Rêber Apo Îmrali ji bo hebûna me kir dibistanek.
Kenan Berekat da zanîn ku Rêber Apo gelek caran ji bo aştiyê bang kiriye, ew ji bo pêkanîna aştiyê amade ye û wiha anî ziman: “Bila dewleta Tirk bizane, Rêber Apo tişta ji aliyê xwe ve kir niha rol li ser dewleta Tirk e. Gel li hêviyê ye ku bibîne Rêber Apo li Kurdistanê digere, wê demê wê bizane aştî pêk hatiye.”
Kenan Berekat diyar kir ku dewleta Tirk nikare gel bixapîne, çi qas astengî derbixin jî wê ya dawî serkeftina gel be û wiha got: “Xebata me ya herî yekemîn têkoşîna ji bo Rêber Apo ye.”
Meş bi slogana “Bijî berxwedana Îmralî” bi dawî bû.
