Ji 12’ê Nîsanê û vir ve di navbera herdu welatan de bi navbeynkariya Ummanê 3 tur hevdîtin hatin kirin. Hevdîtinên tura 4’an, wê li ser fikarên têkildarî fealiyetên dewlemendkirina uranyumê bên kirin.
Nûnerê taybet ê Rojhilata Navîn ê Dewletên Yekbûyî yên Emerîkayê (DYE) Steve Witkoff wê pêşengtiyê ji şandeya Emerîkayê, Wezîrê Karên Derve Abbas Arakçi jî wê pêşengtiyê ji şandeya Îranê re bike. Arakçi di daxuyaniya roja Înê de diyar kir ku di hevdîtinên berê de ‘pêşketin’ hen û got, “Hingî ku pêşde diçin, hîn zêdetir pêdivî bi îstişare û dem heye.”
Alîkarê Serokatiya DYE’yê JD Vance jî roja Çarşemê daxuyanî da û anî ziman ku hevdîtin “li ser rêya rast in”.
Li gorî daxuyaniyên fermî tê fêmkirin ku peymaneke nû tê armanckirin ku nehêle Îran çekên nukleer bi dest bixe. Tehran jî îdîa dike ku nêta wan a pêşxistina çekên nukleer tune ye û bername bi temamî ji bo sivîlan e. Peymana nukleer a ku sala 2015’an di navbera Îran û hêzên cîhanê de hatî îmzekirin, di sala 2018’an de piştî ku serokê demê yê DYE’yê Donald Trump weke yekalî ji peymanê vekişiya, ji meriyetê derket.
Îran di rewşa heyî de uranyumê ji sedî 60 dewlemend dike; ev rêje bi ser sînorê %3,67’ê ye ku di peymana 2015’an de hate diyarkirin û ji bo bikaranîna leşkerî jî nêzî asta sedî 90 e.
Steve Witkoff roja Îniyê daxuyanî da û diyar kir ku rêveberiya Trump li dijî wê yekê ye ku Îran uranyumê dewlemend bike.
Her çendî ku bendewariyên ji bo encamên hevdîtina roja Yekşemê zêde jî bin, Witkoff got, “Eger roja Yekşemê hevdîtin erênî derbas nebin, wê hevdîtin bidomin û em neçarin rêyeke din bişopînin.”
