Kongreya Awarte ya 12’emîn a PKK’ê ku di navbera 5-7’ê Gulanê de li du qadên cuda yên Herêmên Parastinê yên Medyayê bi hemwextî pêk hat, bi biryarên girîng bi dawî bû. Ji delegeyên kongreyê Cemal Amed anî ziman ku biryarên hatine wergirtin ji bo PKK’ê destpêka demeke nû ye. Axaftina Cemal Amed bi vî rengî ye:
“Weke Rêber Apo jî diyar kir, em çiqasî nîqaşan bikin em ê ewqasî pêvajoyê bi pêş bixin. Em çiqasî fêm bikin, em ê hewl bidin pêvajoyê bi pêş bixin. Hevalan jî diyar kirin ku li gel temambûna pêvajoyeke dîrokî ya têkoşîna 52 salan, ewqasî destpêka pêvajoyeke nû ya têkoşînê ye. Serketina wê jî avakirina vê diyalektîkê ye. Divê mirov vê diyalektîkê rast fêm bike, li gorî vê lê hûr bibe û rêbaza vê ya rêxistinî derxîne holê. Ev yek wezîfe û berpirsyariya me ya esasî ye.
Rêber Apo ji bo destpêkirina PKK’ê got, serhildana hişmendî û dil bû. Bi rastî jî wisa ye. Em bi PKK’ê ava bûn. Weke netewe, gel û kes em bi vê dîrokê re ava bûn. Niha Rêber Apo vê dîrokê bi dema nû, bi xweparastina gelê Kurdistanê re, li ser esasê azadiya gelên herêmê digihîne qonaxeke nû. Rêber Apo şoreşa Kurdistanê weke şoreşeke Rojhilata Navîn û mirovahiyê dike armanc.
PKK’ê dawî li înkarkirina Kurdan anî, lê nekarî azadiyê misoger bike. Ev yek ji bo me bû mijara esasî ya rexnedayinê. Bi azadiya gelê Kurdistanê re, azadiya tevahî mirovahiyê û Rojhilata Navîn daniye pêşiya xwe, ku ev yek di vê kongreyê de bûye destpêkeke dîrokî. Yanî ev kongre ji bo destpêkirina pêvajoyeke nû ya têkoşînê jî, bi qasî kongreya destpêkê ya PKK’ê xwedî girîngiyeke dîrokî ye.
Rêber Apo got, sedsala 21’an sedsala jinê ye. Bi vê kongreyê re Rêber Apo erk û berpirsyarî dide me ku wê ev sedsal bibe ya şoreşa jinê. Yanî bi PKK’ê re me heta cihekê karîbû vê yekê bikin. Lê belê ji vir û şûnde bi amûr û rêbazên hîn cudatir ên têkoşînê, em şoreşa herêmê û cîhanê weke hedef didin pêşiya xwe. Ez silav û hurmetê xwe pêşkêşî Rêber Apo dikim ku şoreşeke mirovahiyê ya wiha weke hedef daniye pêşiya me.”
