Festîvala Çandî ya Kurd ku li paytexta Fransa Parîsê îsal cara çaremîn tê lidarxistin, li pêşiya Navenda Çanda Kurd a Ahmet Kaya destpê kir.
Axaftina vekirinê ji aliyê Hevserokê FCDK-BF’ê Azad Dogan kir. Azad Dogan beşdaran silav kir ku ji bo parvekirina heyecana festîvalê hatibûn û spasiya her kesên ku keda wan di organîzekirinê de heye kir.
‘EM Ê ÇAND Û NASNAMEYA XWE BIDIN JIYÎN’
Azad Dogan bi berdewamî wiha got: “Nasname û çanda me ku ji aliyê pergalê ve rûbirûyê qirkirin û asîmîlasyonê hatiye hiştin ji bo me pir girîng e. Her dar di koka xwe de şîn dibe, divê em îşaret bi girîngiya çand û nasnameyê bikin. Bi taybet ji bo me Kurdan ku di qirkirina çandî de ne, xwedîderketina li çanda me erkekî civakî ye.”
Dogan diyar kir ku festîvala ku îro starta wê hat dayîn, di 23’ê Gulanê de bi konserekî mezin bi dawî bibe û wiha got: “Heta 23’ê Gulanê wê gelek çalakiyên me hebin. Em bang li tevahî gelê xwe dikin ku tevlî festîvalê me bibin. Ji bo ku çand û nasnameya xwe bidin jiyîn divê bi awayekî herî xurt xwedî li festîvala xwe derbikevin û tevlî bibin.”
Girseya ku li ber stranên Kurdî bi dahol, zirne û erbaneyan li pêşiya Navenda Çanda Kurd a Ahmet Kaya kom bûn, heta Şaredariya 10’emîn a Parîsê meşiyan. Şaredara 10’emîn a Parîsê Alexandra Cordebard li ber şaredariyê girseyê pêşwazî kir. Li pêşiya şaredariyê bi cil û bergên gelerî û bi stranên Kurdî govend hate gerandin. Piştre bername li hundirê şaredariyê dewam kir.
Şaredara 10’emîn a Parîsê Alexandra Cordebard axaftin kir û got, “Wekî Şaredariya 10’emîn a Parîsê, ji ber ev çalakî li şaredariya me hate lidardixin em serbilind in. Ji vê herêmê re ‘Kurdistana Biçûk’ jî tê gotin. Ji ber hûn li vir in em kêfxweş in. Ez mihrîcana we pîroz dikim û piştgiriyê didim we. Dixwazim bibêjim ku em biryara Rêberê Gelê Kurd Abdullah Ocalan a ji bo demokratîkbûnê û danîna çekan pir wêrekî û hêja dibînin. Em piştgiriyê didin biryara Birêz Ocalan û hêvî dikin ku aştî û demokrasî pêk were.”
Di çalakiya li Hola Şaredariyê hate lidarxistin de Şaredara 10’emîn a Parîsê, endama Meclîsa Şaredariya Bajarê Mezin a Parîsê Genevieve Gerigos, endamê Meclisa Şaredariya Parîsê ya 10’emîn Elie Josseli, endamê Meclisa Şaredariya Bajarê Mezin a Parîsê ya 19’emîn û her wiha Cîgirê Şaredarê Parîsê yê 10’emîn Francois Bechieau, endamê Meclisa Şaredariya Parîsê yê 10’emîn Silvan Raifaud, endamê Meclisa Reimsê Zabbaou Liman û Hevserokê Komeleya ACORT’ê Umît Metîn jî amade bûn.
Roja yekem a mihrîcanê bi konsera muzîka Kurdî bi dawî bû.
