Ji 8`ê Kanûna 2024’an ve dewleta Tirk a dagirker bi rengekî hovane êrîşî binesaziyên Herêma Bakur û Rojhilatê Sûriyê kir, li kantona Firatê jî bi taybet stasyona kehrebeyê, avê û cihê xizmetê kir hedefa xwe, di encamê de gel bê kehrebe û av dima.
Di 1`ê Sibatê de dewleta Tirk êrîşê stasyona gundê Şêxlera jorîn kir, êrîş bi balafirên şer bûn, di encama wê êrîşê de stasyona avê bi temamî hatibû rûxandin. Kobanê û gundewarên wê 4 mehan zêdetir bê av man.
Her ku tîmên taybet yên ku berê xwe didan gundê Şêxler da ku stasyona avê ji nûve saz bikin û avê berdin bajarê Kobaê , dibûn armanca êrîşa dewleta Tirk a dagirker.
Çeteyên dewleta Tirk a dagirker bi çekên navîn êrîşî tîmê dikir û di encama wan êrîşan de tîm mecbûr dibû ku bi paş ve vegere. Ji wê demê ve gel bê av bû.
Îro jî xelkê Kobanê û gundewarên wê weke mertalekî zindî berê xwe da stasyona avê da ku tîma taybet a stasyonê, stasyonê ji nû ve saz bike û avê berde bajarê Kobanê. Li Şêxlera Jorîn car din ruhê berxwedaniya bendava Tişrînê hat jiyankirn. Li wir gel bi wê rihê li ber xwe dida. Li Şêxler dirûşme dihatin berzkirin, ew jî weke bersivekê bû ji êrîşa dewleta Tirk a dagirker re.
Piştî wê heta demekê tîmê karê xwe yê sazkirina stasyonê bidawî kir û av berda bajarê banenê û gundewarên wê. Gel jî piştî bi dawîkirina xebata tîma stasyonê, car din zivirîn û berê xwe dan bajarê Kobanê.
Gelê li wir ji ANF`ê re axivî û diyar kirin ku ji bo ava xwe çawa li bendavê li ber xwe dane ew ê li vir jî li ber xwe bidin.
`EM Ê AV, AX Û KEHREBEYA XWE BIPARÊZIN`
Dayîka bi navê Bedîa Îbrahîm ku yek ji kesên berê xwe da stasyonê got: “Em hatin vir ji bo parastina ava xwe, çawa me li bendava Tişrînê av û kehrebeya xwe diparast, em li vir jî car din ava xwe diparêzin ji êrîşa dagirkeriyê. Em jî hatin li vir da ku tîma me ya avê karê xwe berdewam bike, em li bajarê Kobanê ji ber êrîşa dewleta Tirk a dagirker bê av bûn. Em jî weke mertalê zindî bûn ku ji bo li hemberî dijmin bisekinin û ava xwe biparêzin. Em ê av, ax û kehrebeya xwe biparêzin.”
`KES NIKARE LI HEMBERÎ ÎRADEYA ME BISEKINE`
Dayîka bi navê Nazê Mihemed Elî ku ji bajarê Qinê ye, anî ziman ku ew çawa bendava xwe parastin e, wê vê derê jî biparêzin û wiha got: “Em ê vê stasyona xwe ji çeteyên dewleta Tirk biparêzin. Ew nahêlin ku tîma me li vir kar bike. Bajarê Kobanê û gundewarê wê bi giştî bê av e, lê em hatin vir da ku em bibin mertalekî zindî û ava xwe car din berdin. Ruxmî ku bi balafirê şer hemû stasyona hat rûxandin jî, lê em ê car din stasyona xwe saz bikin. Em biçûk û mezin li vir in. Em ê ava xwe berdin, kes nikare li hemberî îradeya me bisekine. “
`EM Ê HETA DAWIYÊ LI BER XWE BIDIN`
Hevserokê Şaredariya Bajarê Qinê Omer Silêman jî axivî û ev yek got: “Em li vir dîsa berxwedaniya xwe berdewam dikin. Em li vir in ser çemê xwe ne. Em bê av bûn. Em bang li mafên mirovan dikin ku bila zanibin ku em bê av in. Dijminê me jî êrîş dike. Lê em ê jî heta dawiyê li ber xwe bidin.”
Piştî wê tîma taybet ya avê karê xwe bi dawî kir û av berda bajarê Kobanê û gundewarên wê. Piştre jî gelê Kobanê û gundewarên wê vegeriyan.
