Piştî biryara PKK’ê ya xwefesixkirinê û bidawîkirina têkoşîna çekdarî, DEM Partiyê karên xwe yên ji bo vegotina pêvajoyê ya ji gel re zêde kir.
Rêxistina Bajarê Stenbolê ya DEM Partiyê bi taybetî sê hefteyên dawî karekî berfireh dike û ji gel re qala pêvajoya nû dike. Di vê çarçoveyê de serdan li zêdeyî 900 malî hate kirin; bi beşdariyeke berfireh a gel 46 civîn hatin lidarxistin û hevdîtin bi 14 komeleyên herêman re hate kirin.
Di civînan de bersiv ji pirsên li ser pêvajoya nû re hate dayin, detayên pêvajoyê hatin parvekirin û hewl hate dayin ku bersiv ji fikarên gel re bê dayin.
Hevserokê Stenbolê yê DEM Partiyê Çinar Altan li ser mijarê ji ANF’ê re axivî.
Altan destnîşan kir ku li şûna xwedîderketina bi gotinana a li pêvajoya aştiyê, tevlîbûna li têkoşînê hîn bêhtir bi wate ye û anî ziman ku ji bo veguherîneke demokratîk pêwîstî bi zexteke civakî heye.
Altan got, “Di pêvajoya heta niha de xweedîderketina li meseleyê, pejirandina cewhera wê girîng bû. Ji aliyê partiya me ve jî armanca esasî ya serdana malan û civînên gel ev bû. Lê belê xwedîderketina civakê ya li aştiyê têrê nake. Divê ev yek veguhere pratîkeke welê ku her yek bibe hêmana esasî ya aştiyê û veguhere hêzeke têkoşînê.
Karê esasî yê dema bê divê ew be ku li gel pejirandinê weke zexteke cidakî, weke sernavekî têkoşîneke polîtîk bi cih bê anîn. Mînak, bangên me li dewletê hene ku bi avêtina gavên şênber bersivê bide gavên PKK’ê û Tevgera Azadiyê ya Kurd. Lê belê heta ku ev bang ne şênber bin, dewlet wê gavekê neavêje. Divê em vê yekê bibînin.
Lewma ne tenê partiya me û Tevgera Azadiyê ya Kurd, divê ji aliyê civakî ve em vê yekê veguherînin zexteke pratîkî. Ji ber ku beşeke gelekî berfireh a civakê xwedî li aştiyê derdikeve, dibêje ku dixwaze bi rol rabe; lê belê hîn ji aliyê pratîkkirinê û şênberkirinê ve di pozîsyona ‘bisekine-lê binihêre’ de ye.
Ji aliyê partiya xwe ve di dema pêş de em dixwazin di çarçoveyeke bi vî rengî de civakê bixin nava liv û tevgerê: Di hemû hevdîtinên me de her kes dibêje ew alîgirê aştiyê ye, lê belê ev têrê nake. Eger hûn alîgirê aştiyê bin, hingî bi berpirsyarî rabin, ji bo vê jî bi hin sernavan mafên xwe yên demokratîk li hemberî muxataban bi kar bînin.”
Altan destnîşan kir ku ji bo dewlet jî bi berpirsyariya xwe rabe, wê têkoşîneke bi beşdariya hemû beşên civakê bixin pratîkê.
