Cenazeyê Hunermend Eyşe Şan a ku di 18’ê Kanûna 1996’an de li Îzmîrê jiyana xwe ji dest dabû, piştî 29 salan anîn Amedê ku ev yek wasiyeta hunermenda Kurd bû. Cenazeyê hunermenda Kurd Eyşe Şan piştî merasîmekê li Goristana Yenikoy a li navçeya Rezan a Amedê hate veşartin. Parlamenterên Partiya Wekhevî û Demokrasiyê ya Gelan (DEM Partî), hevşaredar, rewşenbîr, nivîskar, nûnerên sazî û rêxistinan, malbata hunermendê û gelek kesên din beşdarî merasîmê bûn.
Di merasîmê de gelek caran dirûşeya ‘’Jin Jiyan Azadî’’ hate berzkirin û beşdarvanan kulîlk danîn ser gora Eyşe Şanê. Piştre jî stranên hunermenda Kurd hatin strîn.
Kurê hunermendê Mûrat Kese di merasîmê de axivî û diyar kir ku ji niha û pê ve dayika wî emanetî gelê Kurd e.
Endamê malbatê Yuksel Avşar jî axivî û got: ‘’Ez a niha gelekî xemgîn im. Spasiyên xwe li hemû kesên kedkar dikim.Lê belê ev ne tenê bi saya min hin kesên diyar pêk hatiye. Ev daxwaza gelê Kurd bû. Ez pêbawer im ku wê gelê Kurd weke wijdana xwe xwedî lê derkevin. Ew gelekî li sirgunê ma û gelek êş kişandin.’’
Endama Platforma Yekîtiya Jinên Kurd Zînê Dînçer jî ev yek anîn ziman: ‘’Em spasiyên xwe li Şaredariya Bajarê Mezin a Amedê dikin. Eyşe Şan anî welatê wê. Edî ew emanetî gelê Kurd e. Her Kurdek bi ziman û çanda xwe tê nasîn, Eyşe Şan jî wisa tê naskirin.’’
Hevşaredara Şaredariya Bajarê Mezin a Amedê Serra Bûcak jî got: ‘’Îro ji bo me rojeke dîrokî û bi rûmet e. Em dixwazim spasiyên xwe li Platforma Yekîtiya Jinên Kurd bikim ku di vî karî de kedên wê pir in. Eyşe Şan îro li mala xwe ye, li welatê xwe ye û li cem dayika xwe ye.’’
Hevşaredarê Şaredariya Bajarê Mezin ê Amedê Dogan Hatûn û Parlamenterê DEM Partiyê yê Amedê Serhat Eren jî diyar kirin ku hunermenda Kurd Eyşe Şan vegeriyaye xaka xwe û ew ê ji bo anîna hemû kesên li dûrî welatê xwe têkoşîna xwe bidomînin.
